Sam 86 - Natqgu

Sam Kranzpnu-rtqmz-nrade-esz'mz (86) Okatrp Ninge Mz Nzaodu-krm Abrtrpo Drtwrnge Bam

Nabz ne Devet.

¹ Yawe, xlrm nzkrka'-krnge, Murde trxplrwxu x ninge ncblo txne.

² Nim Gct rnge. Arlapx ninge mz nzbzngr murde tenge nim, X ninge kxnzawz nem kc tqmnc-xgle-zvzle nim.

³ Nayc mz drtwrm ninge, Murde vz zvz nzkrka'-krbo bam.

⁴ Kxetu rnge, aelalzm drtwrnge, Murde abrtrpo drtwrnge bam.

⁵ Murde mrlz-esz'ngrn nzripq-zvzngr. X aodu-zvzq krkcng tzkrka'bzng bam.

⁶ Yawe, lalztqm mz nzyrni-krnge, X ayzlum natqnge.

⁷ Mzli ka kqlex nim mz nzkxpu-krnge, Murde angidati-zvzme nzrlx-krbo da bam.

⁸ Kxetu, trpnz-moungr gct kx apule nim, Murde trpnzngr nidr kx rkrlz nzalengr da kxnzkctipxng kcng tqale-zvzq.

⁹ Kxrpalz, lr drtc' amrlx kcng tqwz-ngrn Sa nayrngzobzng bam mz nzarmyalz-krdr nim.

¹⁰ Murde nim txpwz Gct, Kc tqmatq-esz'ngr mz nzale-krm rkx kxetuting.

Angio-zvzx Nim

¹¹ Yawe, aelwa-ngrm bange me pnz drtwrm, murde navz-nqblqx natqm. X alvztrp bange nzamrlue-zvz-krnge nim.

¹² Murde nabznge atwrnrngr na-awibz bam mz nzngini-krm Gct x Kxetu rnge, X na-angio-zvzx drtqm.

¹³ Murde nzaodu-zvz-krm ninge etu-esz'ngr, Mz nzarlapx-krm ninge mz nzbzngr.

Okatrp Ninge Mz Nivz Lrm

¹⁴ Gct, kxnzglqpx-lzbqng nztutitr nardr ninge. Zbo ngr ncblo kxayo lc nzrpilr nanibqlr ninge, murde nzpxtxpx-ngrdr nim.

¹⁵ A' yc zvz mz drtwrm leplz, x zmrlz ngrm myalz-esz'ngr. X drtwrm trngya-aniu, a' nzaodu-krm x nzangidati-krm tqvzpe tqvzpe.

¹⁶ Mz nzmu-krde lcde, yzlum x nayc mz drtwrm ninge. Axplr x arlapx ninge, murde wztrpo bam da kc tqwai lxenge mz nzwztr-krbzle bam.

¹⁷ Yawe, okatrp ninge mz nivz lrm, murde drtq enqmi rngeng namyatx-zlwzng Mzli kc namc-ngrdr nzaxplr-krm ninge x nzapqtr-krme drtwrnge.