Sam 84 - Natqgu

Sam Kranzpnu-rtqmz-nrade-pwx (84) Kxnzmncpxmqng Mangr-nzangiongr Yawe Gct kc Tqrninr Nzmnc-zpwxng Yawe Kc Tqrninr

Nabz ne nqvi lr Kora kx nzyrbzlr mz kxrmailz ngr dzbe kxnzngrng.

^1-2 Yawe kc tqrninr, nim Gct kc tqlu. X mrlz-zlwzm bange Mangr-nzangiongr nim. Murde sutitx zlwz drtwrnge nzmncpx-krmc makoa ngrde, Mrkc tqngr-abrtz-ngrbo bam mz nabznge atwrnrngr.

³ Yawe kc tqrninr, nim Gct x King rnge. Kxnzvzdzng Jerusalem mz nzangio-krdr nim nzrlatrng mz olta nyzmqng. Murde olta nyzm apule ma nyz doa nemqng. Da kc tqwai utc tzwz-ngrdr ma nyz neidr, mz nztapirpx-krdr neimrdr.

⁴ X doa lcng tzmncpxmqng Mangr-nzangiongr nim nzmnc-zpwxng Mz nzangrlvz-zvz-krdr nim.

Newz Saeon

⁵ Namrlzbz mz leplz kcng tzvzdzng mz Newz Saeon mz nzangio-krdr nim, Murde sa na-axplr-mowq nidr.

⁶ Mz nzkawi-krdr nabzlwa kxmingr narmctilr nabzde kx lrting Mz nibr nzdckr tewa.

⁷ X mz nzesotr-krdr Jerusalem nzxplr-krdr sa naetunepx, Murde ycpe pipz nzkrlz-krbzlr Newz Saeon mz nzangio-krdr nim. X nim Gct rgr kxmyaszlzle krkcng tzmncng mzlilxlr amrlx Tzangiolr lr mrkzbleng.

⁸ Yawe Gct kc tqrninr, nim Gct r melrmqgr Jekop. Xlrm nzkrka'-krnge mz nzvztr-krnge ma nyzm.

Nzmnc-zpwxngr

⁹ Rlxtibo bam Kx amrlz-zvzbz king rgr kc tqmcpxq.

¹⁰ Murde nzmnctr-ngrbz bam mz Mangr-nzangiongr nim mz zbq kxesz', Myaszpxle nzmncngr drlve keng mz nrlc mz zbq kang kqlu. X nzprtr-ate-krbo mz naonrx ngr ma nyzm, Myaszpxle nzmnc-zvz-krnge mz ma kxnzetung nyz kxdrka'-ngrng.

¹¹ Murde Yawe, nim King rgr kc tqbatrple nzamatqngr nigr. X nim temz ngr lomrgr kc tqyrputrngr nipna. X aclveq nigr mz zmrlz ngrm, Mz nzrlrpx-zvz-krbzme da kxmrlzting mz kxnztubqng.

¹² Yawe kc tqrninr, Krkcng tzabrtrpzlr drtwrdr bam nzmnc-zpwxng.