Sam 81 - Natqgu

Sam Kranzpnu-rtqmz-nrade-esz' (81) Krkcng Naglqlzlr Ninge, Navz-nqblq-kzlr Natqnge Naglqpxku Gct

Nabz ne Asaf kx yrbzle mz kxrmailz ngr dzbe kxnzngrng.

¹ Namalqlvzku Gct murde nide lrpalvc nyzgu. Nangr-katobzku mz Gct ngr Jekop.

² Na-ayrnitiku gita x ukzlele x na-ayrlewzku nrasrpwale Mz nzngr-krbzku bade nabz kxyrlvi.

³ Trpu navxutr mz nzrkqlengr leplz mz zbq kxnzetuting, Mz zbq ngr nzpokr temz x zbq ngr nzyc-atwrnr-krde.

⁴ Murde krlc natq kx kam Gct bagu, nigu lr Israel, Mz nzka-krbzle loukxtr scde mz nqvi lr Jekop.

⁵ Pipxbzle mz melrmqgung, nidr neidu lr Josip, Mzli kc tqatrkati-ngrde lr Ijipt. X ninge Asaf, mzli kc nzryr-krnge tqkrlzpe-ngrbzle me tavau, Xlrx kc natq kx trglxwxu, a' mz nibrde sc tqglx-atex.

⁶ Rpimle kx, “Sc tqrkatxobo da kxmrlepu kcng tqglqamu. X aopxbo drtqmu mz nzwz-kato-krmu Ijipt.

⁷ Mzli lc tqkxpu-ngrnamu, kqleamu ninge, x sc tqarlapxpex nimu. X sc tqokatrpele nimu tqvzmc mz bzlrmei. X ni-kznge kc tqabzle nimu mrkc lzke Mz aulz ngr Meriba.”

Navz-nqblqku Natqde

⁸ “Naxlrmamu da kx narngidrlvz-ngrbo bamu, kx leplz nengeng. X nalalztqmamu mz natqnge.

⁹ Bzkq angioamu kx trngiu Yawe Gct angidr, Mz nzyrngzo-krbzmu badr.

¹⁰ Murde ninge Yawe, Gct rmu, Kc tqvzmile nimu mz nzrlasz-krmu Ijipt. X sa na-amrlzx nimu mzli kx abrtrmamu drtwrmu bange.

¹¹ Kxmule-esz', a' tryrlq-angidrwamuu natqnge, kx leplz nengeng, Mz nzpxtxpx-krmu ninge.

¹² Mz nzmu-krde lcde, rlrpx-ngrbo bamu nzvz-nqblq-krmu narmu, X nzale-krmu nike suti drtwrmu.

¹³ A' sutitx zlwz drtwrnge kx nalalztqmamu bange, kx leplz nengeng, Mz nzlolvz-amqngi-krmu nqmq krnge.

¹⁴ Murde na-aovxiobo enqmi rmung Mz nzota-krgr badr.

¹⁵ X Krkcng tzpxtxpx-ngrdr ninge, sa narnrcng mz nzyrngzo-krmlr bange, X na-ayrplapx-alox nidr.

¹⁶ A' na-amrlzx nimu leplz nengeng, Murde na-abrtz-zlwzamu mz nzmnc-zpwx-krmu.”