Sam 79 - Natqgu

Sam Kranzpnu-rlimz-nrade-rpwxmz (79) Kxetu, Ayzlu-ebir-ngr-mopwz Badr Enqmi Rgrng

Nabz ne Asaf.

¹ Gct, leplz kxnzmnc-mrbrng nzvztrpqng x nztztilr nigr, Murde natwzlr drtc' lc tqkame bagr. Nzatrkatipelr Mangr-nzangiongr nim, X nzodati-atwrnrpe-ngrdr Jerusalem.

² Namz ngr leplz nemqng nzayrlwrtxnedr Ngi dakxnzng nanq utc x animol kzpetong.

³ Enqmi lcng tzlakitilr leplz amrlx Jerusalem, X mepyr ngrdr yrlenepe apule lue. Mz nzmu-krde lcde, trpnzngr nigr kx rlapx, Kx nayrtzmqlr namz ngr kztedrng.

⁴ Lr mrkzbleng kcng tzmnc-aepztrpqng bagr nznelvzlr nigr mz nzamyati-ngrm drtqgr, X nzxtrnga-ngrdr nigr.

⁵ ?Yawe, ngyati-alope drtwrm nigr? ?Myx kxmule, zngya ngr drtwrm lc tqapule nyr, kx na-angc-alopele nigr?

⁶ Bzkq, a' kx nangyati drtwrm kxtrnzrlxngitiung ngr mrkzbleng, Kcng trnzamatqlru x trnzangiolru nim.

⁷ Murde sc tznibqtipelr nigr leplz ngr nqvi lr Jekop, X tzatrkatipelr drtc' kc tqkame bagr.

Arlapx Nigr!

⁸ Gct, bzkq ayrkrpx-ngrn nigr alwx ngr melrmqgrng, A' nayc mz drtwrm nigr murde nqmq nr nabzgr bao-zlwzpe.

⁹ Mevalu rgr, okatrp x arlapx nigr, x ipqpxbz alwx ngrgrng, Murde leplz ma tzobqszolr nim,

¹⁰ Mz nzrpi-krmlr bagr kx, “?Myxpe Gct rmu?” A' rlr-ngrm nzmc-krgr nzayrplapx-krm leplz lcng, Mz nzayzlu-krbzme badr nznibqti-krbzlr leplz nemqng.

^11-12 Kxetu, ayzlu-ebir-ngr-mopwz badr Nikeng nzalelr mz nzobqszo-krdr nim. X arlapx kz nigr leplz nemqng kcng tzlolvztilr, murde ma tqbzkr, Mz nzayzlu-krme nzyrni-krbzkr bam.

¹³ Murde apukr sip nemqng, X sa na-awi-zvzpebzkr bam mz nzglqlz-alo-krgr nim.