Sam 78 - Natqgu

Sam Kranzpnu-rlimz-nrade-rtqmz (78) Bzkq Apuku Melrmqgung Kcng Tzvecpx-lzbqmqng Mz Gct Nzalvztrkr Sam Ka

Nabz ne Asaf.

¹ Leplz nengeng, lalztqmamu mz nzalvztr-krnge, Mz nzxlr-angidr-krmamu natqngeng.

² Sa naryapwxbo bamu mz nzycmne-ebzpxngr. X sa nayokaetipxbo dalr mzli kc bqnc kx trgalr kxrkrlz.

³ Da lcng tqxlrpeku x tqkrlzpeku Murde nzpipem melrmqgung bagu.

⁴ Bzkq yrlq-kapqbzkung mz doa negung, A' nayapwxtibzku badr.

⁵ Yawe yrlqbzle loukxtr scde mz lr Israel, Mz nzka-krbzle natqde mz nqvi lr Jekop. X rngidrlvz-ngrbzle mz melrmqgu lcng Kx na-alvztr-ngrdr doa nedrng mz lou lcng.

⁶ Murde nayrlqlr lou lcng, X na-alvztr-kzpzlr mz doa nedrng.

⁷ Mz nzmu-krde lcde, nrpr ngr doa amrlx na-abrtrpzlr drtwrdr mz Gct, X na-aoti drtwrdr da kxnzkctipxng kcng tqalele mz nzvz-nqblq-krdr natqdeng.

⁸ X bzkq na-apulr melrmqdrng kcng nardr tqmqngi x tzxpqbrlr-ngrdr Gct. Trtegu lcng nabzdr bao x nzvecpx-lzbqmqng bade.

Trnzbrtiu Drtwrdr Gct

⁹ Mzli kc bqnc kzdung lr Israel, ncblo ngr vea nedrng nzoliq-angidrpeng mz popz' x nipna scdrng, A' mz zbq kc navecpengr, sc tzdwapeng.

¹⁰ Murde trnzatutrlru Nzesz'tikr Drtwrdr badr Gct, X nzpxtxpx-ngrdr lou scdeng.

^11-12 Kxmule-esz' nzmcpelr zmatq ngr Gct, A' trmatqu mz drtwrdr da kxnzkctipxng kcng tqaleleng mrkc Ijipt.

¹³ Akipxle Prla Bla x mz nrlarde rlilr atule apule nztukr drkq, Mz nzmailzo-krde leplz nedeng elr.

¹⁴ X mz nzvz-krdr ngrlx, mailzle nidr mz dcbz, X nyr rtwayzbz badr mz nrlckxbq.

^15-16 Mzli kc tzmnc-ngrdr lzke, amrplxtrpzle rplz Kx yrlepx-ngrm lue x ningali. Murde narmnqng x drtwrdr naesatxpx zpwx Mz lue lc tqkabzle badr, tqxplrm nzyrle-krde.

¹⁷ Kxmule-esz', a' vz zvz nzatrkati-krdr Gct kc tqmyalz-esz'ngr, Mz nzale-krdr alwx x nzxpqbrlr-ngrdr nide.

¹⁸ Mz nzmqngikr nabzdr nzabzlr nzatalzngr Gct, Mz nzka-krbzle dakxnzng kx naesapxngr drtwrdr.

^19-20 Nzpibqtilr Gct, nzrpilr kx, “Kxmule-esz' luplxtrle rplz x lue yrlepx-katom elr, A' rblxbz bade nzrka-krmle nagu dakxnzng, Mz nzaclve-krde nigu leplz nedeng.”

Dakxnzng Kxvzom Heven

²¹ Yawe kx xlrle kc nzycmne-krdr, drtwrde trmrlzlzpuu. X zngya ngr drtwrde kc tzapqtr-zlwzbzlr.

²² Murde trnzlxngitilru nide, X drtwrdr trnzabrtrpwzlru bade mz nzaclve-krde nidr.

^23-24 Kxmule-esz', a' lvxpxbzle bongavz, Mz nzatwzlro-krmle badr dakxnzng ngr Heven.

²⁵ X mzli lcde, leplz txneng nzmung dakxnzng nan enjrl, Mz nzangidati-krbz Gct zbrtale ngr nelzdr.

²⁶ X mz zmatq ngrde kz Sc tqawqpele nenq tonga x trlaki.

²⁷ X nenq lcng li nzrtwzmqng blzmr kio, X nzyrlwrne-krdr apule drta' ngr prla.

²⁸ Kio lcng nztatiomqng mz drtc' O-ngalele ma nyzdrng.

²⁹ Gct kabzle badr nikeng nzsuti zlwz drtwrdr. Nzngqdr x nelzdr krlc.

³⁰ Kxmule-esz', a' drtwrdr tresapxu. X mzli lc tzmube-ngrdr,

³¹ Gct sc tqnibqtipebzle obla nedr kcng tzxplrng, Mz nzngyatikr drtwrde nidr.

Vz Zvz Nzale-krdr Alwx

³² Kxmule-esz' Gct ayrplapx-katole nidr mz alwx ngrdrng, a' sc tzale-zvzng alwx. X kxmule-esz' nzmcpelr nzale-krde da kxnzkctipxng, a' trnzlxngitilru nide.

³³ Zbz sc tqnibq-anipele nidr Mz nzapusr-krdeleng lue kc tqmilqpx mz leu r nya x tqmrbro mz drtc'.

³⁴ Kx nibqle kcng, opxm kx drtwr kxnzlubeng sc tqyzlu-mopwz bade, Mz nzplzpx-krbzlr alwx ngrdr x nzkrka'-krbzlr bade.

³⁵ X opxm kz kx dctipx mou drtwrdr kx Gct kc tqrninr nide butqbr nyzdr, Kc tqarlapx-zvzle nidr.

³⁶ Kxmule-esz', a' nzpokiatilr nide Mz nzrpi-krbzlr bade kx nzmrlztilr nide.

³⁷ Kxmule-esz' nabzdr bao, X trnzatutrlru Nzesz'tikr Drtwrdr badr,

³⁸ A' trodatileu nidr, murde yckqti mou drtwrde nidr x ipqpxbzle alwx ngrdrng. X nzwrde kqlu kx ngyatingr drtwrde nidr, a' lolvztxde zngya ngr drtwrde.

³⁹ Murde krlzle kx nidr leplz x nzkrlzlr nzbzngr, Mz nzapu-krdr nenq kc tqwq x sc tqamaneope.

Mzli Kc Lzke

⁴⁰ Nzwrde kqlu lzke nzxpqbrlr-ngrdr nide, Mz nzavzti-krbzlr drtwrde.

⁴¹ Zvz nzale-ebir-krdr da kx nzangyati-ngrbzlr drtwrde, Mz drtwrdr kx lctr-zvzbz mz Gct kc Tqtr-esz'ngr.

⁴² Mrbrtr mz drtwrdr zmatq ngrde Mz nzarlapx-krde nidr mz mq enqmi rdrng.

⁴³ Mzli kc tqale-ngrde da kxnzkctipxng Mz nzvzmipx-krde nidr Ijipt.

Mzli Kc Tzmnc-ngrdr Ijipt

⁴⁴ X mzli kc tzmnc-ngrdr Ijipt, ngi-batrpzle lue kxetung nzlrtipx-krdr mepyr, Murde lr Ijipt ma tzrmnqng lue.

⁴⁵ Atwzlr-ngrmle frck kxkqlu kx na-atrkatilr mrnyzdr, X mc kxkqlu kx namakxtilr nidr.

^46-48 Nibqtibzle kzu, sip, x gout nedrng Mz kzdq zyagox kxtrka. X mz nibrde atwzlr-ngrmle trlipu kxetu, Mz nzamzti-krbzle nounc x dalr nrlanc nyzdrng mz nzatatio-krmleleng muli-aes. Zbz sc tqatwzlrpe-ngrmle kionabr Mz nzngqti-krdr dakxnzng amrlx kx nzlutinepwzng mz nrlanc.

⁴⁹ X mz nzngyati-zlwzkr drtwrde lr Ijipt kcng tzakxputilr leplz nedeng, Atwzlr-ngrmle enjrl kxnzkqlung mz nzpulio-krmlr nyr mz nzayrplapx-krdeleng.

⁵⁰ Trlolvzleu zngya ngr drtwrde, A' xplr-esz'ngr apule nubla ngr lue mz nznibqti-krde nidr.

⁵¹ Nibqtibzle doa ncblo kx ayrnrngr nedrng, Nidr kcng tzvzpxmqng mz nqvi lr Ham, doa ne Noa.

Nzrlasz-krdr Ijipt

⁵² Mz nibrde sc tqrtwayzpebz mz leplz nedeng mz nzrlasz-krdr Ijipt. X mailztrle nidr lzke mz nzapu-krdr sip nedeng.

⁵³ Aclve-angidrle nidr, x trnzmwxlru. A' aboobzle enqmi rdrng amrlx prla.

⁵⁴ X mz nibrde sc tqvzmitr-atele nidr mz drtc' kxtr nyzde, Kenan, Mrkc tqtungr Newz Saeon, kx nztwz mz zmatq ngr nzaovxio-krde.

⁵⁵ Maneutipxle leplz kxnzmnc-mrbrng mrlcde, mz nzvztrkr leplz nedeng mz drtc' lc. X sc tqakipxpebzle drtc' lc mz neidu lr Israel kcng nzpnu-esz'-nrade-li, x nzmncpx-alzupq'ng mz ma nyzdr.

Mzli Kc Tzmnc-ngrdr Kenan

⁵⁶ Kxmule-esz' nzmncpeng mz drtc' kxtr, a' sc tzycmne-plztitrlr x nzxpqbrlr-ngrdr Gct kc tqrninr mz nzpxtxpx-krdr natqdeng.

⁵⁷ Leplz lcng nzapulr melrmqdr kcng bqnc mz nzesablqti-krdr nide x nzvecpx-lzbq-krmlr bade. Mz nzmu-krde lcde, trpengr kx brti drtwrde nidr.

⁵⁸ Nzangyatibzlr drtwrde mz nzangio-krdr kx trngiu Yawe Gct angidr, X mz nzyrngzo-krbzlr mz mqngr da kxnzlz.

⁵⁹ Kx mcle da lcng tzaletilr, ngyati zlwz drtwrde leplz nedeng, X sc tqpxtxpxpe-ngrde nidr.

⁶⁰ Rlasz-pnzle Tentkxtr nyzde kc mztea Saelc, mz drtc' nyz Efrem. Mrkc tzmnc-kai-ngrdr badr leplz nedeng.

⁶¹ X rlr-ngrbzle mz enqmi nztwz-krdr Bokis kc tqyclz-ngrm Nzesz'tikr Drtwrdr Badr, Kc tqngi rkx ngr zmatq x nzmyapx-esz'ngr-krde.

⁶² X mz nzngyati-zlwzkr drtwrde leplz nedeng, Rlr-ngrbzle mz enqmi rdrng nznibqti-krdr nidr.

⁶³ X obla nedrng amrlx nzbzting mz vea, X olvi nedrng trpengr obla kx naryrlzting.

⁶⁴ Pris nedrng nzbzti-kzng mz vea, X olvz ngrdr nzmwxlr-zlwzng x trpnzngr mzli kx nayrnimi-ngrdr namz ngrdr.

⁶⁵ Mz nibrde, mz drtwrdr opxm kx Kxetu apule ncblo kx melz-atem Mz nzmwingr mz nzrmnq-krde waen.

⁶⁶ X mzli lcpwz aovxiole enqmi rdeng, Mz nzamyati-alo-krbzle drtqdr.

Gct Mcpxle Neidu Lr Judz, Newz Saeon, X Devet

⁶⁷ Gct trsutiu drtwrde doa neng Josip, X sc tqrlaszpele drtc' nyz Efrem, kzdq mrlxde.

⁶⁸ A' mcpx-alzule neidu lr Judz, Mz nzmnc-krde Newz Saeon, kc tqmrlz-zlwzbz bade.

⁶⁹ Mrlc dekc tqwztio-ngrde Mrkc Tqtr murde nayc alo elr, Da kc tqwai nzyc-alokr Heven x nrlc.

^70-71 X mcpx-kzle Devet kx nawztrpz bade. X kapxmle nide mz nzaclve-krde sip neng trtede, Murde nanginide king r lr Israel, Mz nzaclve-krde leplz neng Gct.

⁷² X nzaclvekr Devet nidr tubq, Mz nzmailz-zpwx-krde nidr.