Sam 77 - Natqgu

Sam Kranzpnu-rlimz-nrade-rlimz (77) ?Nzngya-zlwzkr Drtwr Gct Mrilvzole Nivz Lrde? Nzkrka'ngr

Nabz ne Asaf.

¹ Yrnibo mz Gct. Yrni-katobo bade murde naxlrmle natqnge.

² Mzli ka tqkxpu-ngrne, glalzbo mqnge mz Kxetu. Kxmule-esz' krka'tix nzwr nrlckxbq, a' trxngipwc'u nzamqtr-ngrm drtwrnge.

³ Gct, kx aoti drtwrnge nim, nabznge ngrgo. X sc tqyrni-katopex mz nzetqkr drtqnge.

Nzrlxtingr

⁴ Nzkxpu-krngeng aobqtx-zvzle ninge mz nrlckxbq, X rblx-kzp bange nzycmnengr mz nztalvzokr nabznge.

⁵ Aoti drtwrnge zbq kcng pnz X yiz kcng bqnc.

⁶ X drtwrnge ao-zlwzx mz nrlckxbq. A' drtwrnge kc tqveabe kx,

⁷ ?Myx kxmule, Kxetu sa napxtxpx-alope-ngrde nigr? ?X trpengr nzmrlzti-mou-krde nigr?

⁸ ?Nzaodu-krde nigr sa nayrkrpx-alope? ?X nzesz'tikr drtwrgr badr naesakipe?

⁹ ?Myx kxmule, Gct trnaycpeu mz drtwrde nigr? ?X nzngya-zlwzkr drtwrde mrilvzole nivz lrde?

¹⁰ Xngitxtr-zlwzx Gct kc tqmyalz-esz'ngr traelwapxpe-ngrpleu zmatq ngrde bagr.

Nqmq Kr Gct

¹¹ Yawe, sa tqdcpx mz drtwrnge nqmq krmqng, X da kxnzkctipx kcng tqaletiqng mzli kc bqnc.

¹² X sa na-aoti zlwz drtwrnge da kxmrlz kxetuting Kcng tqwz-ngrn mz zmatq ngrm.

¹³ Gct, nqmq krmqng amrlx tr-esz'ngr, X trpnz-moungr gct kx myaszpxle nim.

¹⁴ Nim txpwz Gct kc tqaleti da kxnzkctipxng, Mz nzbatr-krbzme mz lr mrkzbleng nzmc-krdr nzxplr-krm.

¹⁵ Arlapxpeq nqvi lr Jekop x Josip, murde nidr leplz nemqng, Mz nzaovxio-krm enqmi rdrng mz zmatq ngrm.

Zmatq Ngr Gct Mzli Kc

¹⁶ Gct, mzli kc tqvz-ngrme, prla rnrcti-lzbq, X wai-kzle meboo-ngrng.

^17-18 X drtc' ycngrlrlzm mz trlipu. X zbo nzadclr tewa kxetu. X bzlrpc rpnakile nrlc apule nipna Mz nzpnamilxti-krde nrlc. X bzlrmei yrpu-zlile bongavz Mz nzpro-krm nounenq.

¹⁹ Kxmule-esz' trpnzngr kxrmc nabzlvz r nanycm x lrpzki rm, A' sc tqkawicpeq meboongr ngr Prla Bla.

²⁰ X mailzq leplz nemqng mz nzapu-krdr sip, Mz mq Mosis x Eron.