Sam 75 - Natqgu

Sam Kranzpnu-rlimz-nrade-nzlvqn (75) Waen Kx Xplr Ngr Nzayrplapxngr

Nabz ne Asaf.

¹ Gct, awitx-ngrbzkr bam mz nzmnc-aepztr-krme bagr. Aleq da kxmrlzting. Gct, awitx-zlwzbzkr bam.

² Gct rpile kx, “Yrlqpex mzli kx napipx-ngrne doa kx tubq x kx vz-rbr. X nzayzlu-krbo da badr narsakrlrngr.

³ Kxmule-esz' nrlc badr leplz ngrdeng nzrnrcng, A' sa nalolvz-amqngix nou nrlc.

^4-5 Pibo mz kxnzglqpx-lzbqng kx bzkq nzglqpx-lzbqng Mz nzbilvz-krdr zmatq ngrdr. X pi-kzpo mz kxdrka'-ngrng kx bzkqpe nzarmyalz-lzbqng, Mz nzailvzo-krdr kztedrng.”

⁶ Murde trpnzngr me vzkipxm nzarmyalzngr Mrka mz nrlc.

⁷ A' Gct txpwz kx na-ayzlu-ngrbzle da mz leplz amrlx, Mz nzayrplapx-krde kxdrka'-ngrng x mz nzarmyalz-krde kxnztubqng.

⁸ Yawe ngyati zlwz drtwrde kxdrka'-ngrng. X mz nzayrplapx-krde nidr Na-apule kx rkabz badr kap ngr waen kx xplr. X mz nzmnq-krdrle trpnzngr kxpipz kx nayctxo, a' nayrkrtxlzm.

⁹ A' trtxpnzngr nzesakikr nzyapwxtine-krnge Gct r Jekop, X sa na-angrlvz-zvzx nide.

¹⁰ Murde rpile kx, “Sa naodatix zmatq ngr kxdrka'-ngrng, A' zmatq ngr kxnztubqng sa na-aetunepxbo.”