Sam 74 - Natqgu

Sam Kranzpnu-rlimz-nrade-pwx (74) Bzkq Mrbrtr Mz Drtwrm Nigr Kxnzakxpu Nemqng Nzangctitx Enqmi Makxtr Nyzmqng Amrlx

Nabz ne Asaf.

¹ ?Gct, memule tqrtctx-alope-ngrn nigr, Mz nzngyatikr drtwrm nigr sip nemqng?

² Nadcpx mz drtwrm nigr kcng tqmcpxqng mzli kc bqnc, mz nzarlapx-krbzm nigr mz mq kxnzakxputilr nigr, X mz nzmnc-krme bagr mz Newz Saeon.

³ Vztr ena mrlcde mz Mangr-nzangiongr nim Jerusalem, Murde namcq nzodati-atwrnrkr enqmi rgrng da amrlx mrka.

⁴ Enqmi lcng nzmalqlvzlr Mangr-nzangiongr nim, Nzpetr-krdr nc nqngq ngr nibr kxrmailz ngrdr mz nounc kx nzatulr mrlcde mz nzaelwapx-krdr nzaovxio-krdr nigr.

^5-6 Nztaglctilr mz xks x hama scdrng da kcng tzlzting amrlx mrlcde, Mz nzapu-krdr ncblo kx narlaking nounc.

⁷ Nzkatrpzlr nyr ngr Mangr-nzangiongr nim, Mz nzmatinetrkr drtwrdr nztr-esz'ngr-krm.

⁸ X nzangctitxdr mrkcng amrlx tqangio-ngrgr nim mz drtc' nyzm, Murde narnzlvzo-atwrnr-ngrdr nigr.

⁹ Dalr nzangio-krgr nim lcng amrlx nzmrbrtipeng, X trpengr profet kx narpim bagr mzli kx naesakingr nzkxpungr lc.

¹⁰ ?Gct, myx mzli kx nakrlzbz enqmi rgrng nzxtrnga-krdr nim? ?Myx kxmule, narlrtx-alope-ngrbzme nzycmne-atrkati-krdr drtqm?

¹¹ Bzkq mnc-lrpitxn, A' odati nidr mz nzokatr-krm nigr.

Nim Kxrpalz Kx Xplr

¹² Gct, kxmule-esz' nzmusrnepegr lc, a' nim King rgr yzutr pnz mzli kc bqnc. X nzwrde kqlu kx arlapx-ngrn nigr.

¹³ Sc tqakipxq Prla Bla mz zmatq ngrm. X tqtamyrnr-ngrn nardr mepwz kc tqngi Ijipt.

¹⁴ Murde aovxioq kxnzetu rdrng, X kabzme nrkrdrtqdr nangq animol ngr lzke.

¹⁵ Sc tqaglqwiq mrkc tqrpnakilzm aulz x narlue. X apz-kzq me nakawicngr LueJodzn.

¹⁶ Nim kxrpalz kc tqwz-ngrde ngrlx x nrlckxbq, X nim kc tqryrlq nepi x temz mrnyzdr.

¹⁷ X nim kc tqryrlqbz me nangi bz ngr prla x drtc', X yrlq-kzpzme mzli r zbao x zpq.

Arlapx Nigr!

¹⁸ A' Yawe, nadcpx mz drtwrm kx enqmi rgrng nzxtrnga-ngrdr nim, X nzatrkatilr drtqm mz nzycmne-krdr mz nzobqszo-krdr nim.

¹⁹ Bzkq mrbrtr mz drtwrm kxnzakxpu nemqng, Mz nzapusr-krm nigr bona kx nalolvzti kuli kzpeto.

²⁰ Nadcpx mz drtwrm Nzesz'tikr Drtwrgu mz nzarlapx-krm nigr, Murde mzli ka ncblo kxayo nzkqlupeng kxnzmnc-kapqneng mz nzlo.

²¹ Bzkq rlr-ngrbzme badr nzaovxio-krdr nigr kxnzakxpung, Murde nigr leplz txneng kx trpnzngr scdr zmatq naglqlzkr nim.

²² Gct, vzm mz nzatubqti-krm drtwr kxnzobqszolr nim, Mz nzdcpxkr mz drtwrm kx nzxtrnga-zvz-ngrdr nim.

²³ Bzkq mrbrtr mz drtwrm enqmi rmqng kx nznemi-zvzlr zngya mz nzatrkati-krdr nim. A' vzm mz nzawx-nabu-krm nidr mz natqdr.