Sam 72 - Natqgu

Sam Kranzpnu-rlimz-nrade-li (72) Nzaclvekr King Kxnzmcpx Nztubq-krde

Nabz ne Solomon.

¹ Gct, batrpz nzaxvctr-krbz king rgr mz zmrlz ngrm, X okatrpz nide mz nzvz-nqblq-krde nztubq-krm.

² Murde nzaclve-krde nigr leplz nemqng namrlz, X na-atubqtibzle da mz kxnzobqszong.

³ X nigr amrlx sa namnc-zpwxkr, Mz nzmnclz-krbzkr mz nztubqkr nzaclvekr king rgr.

⁴ Sa natubz mz nibr kxnzobqszong, X sa na-arlapxle kx trpnzngr scdr zmatq mz nzaovxio-krde kxnzakxputilr nidr.

Nzamrlz-krde Leplz Nedeng

⁵ Nzamrluekr leplz nim sa navz zvz, Da kc tqwai nzyzlr-zvzkr nepi x temz.

⁶ X King nem sa na-amrlzle nigr leplz nedeng, Mz nzapu-krde tewa kc tqdcom mz nrlanc.

⁷ Mzli kc tqngini-ngrde king nztubqngr naetunepx mz nrlc, X nzmnc-zpwxkr leplz navz zvz da kc tqwai nzyzlr-zvzkr temz.

Mrkc Tqaclve

⁸ Nzaclve-krde yzutrle mz Lue Yufretis, Nakrlzbzle mz nrlc tulvzo.

⁹ Enqmi rdeng sa na-aovxioleng, X nayrngzobzng bade.

¹⁰ King mz nrlc tulvzo sa nartwzmqng bade dalr nzrle-kangr, Myapxbz king r trmctung, x Arabia, x Afrika, murde namnc-lxblrng badr mz nrwx.

¹¹ King amrlx sa nayrngzobzng bade, X leplz amrlx sa na-angiolr nide.

Nivz Lrde

¹² King lc sa natubz mz nibr kx trpnzngr scdr da, mz nzkqle-krdr nide. X naokatrle kxnzobqszong kcng tzmncng esz'-krdr.

¹³ Sa naycngr drtwrde kxtrnzxplrung x kx trpnzngr scdr zmatq. X na-arlapxle nra-nzlung ngr leplz.

¹⁴ Sa naxpepxle nidr mz mq kxnzakxputing x kxnzatrkatilr nidr, Murde matq mz drtwrde nzlu-krdr.

Da Kxmrlzting Kx Navzpxmqng Mz Nzaclve-krde

¹⁵ Leplz amrlx sa nakrka'-ngrdr nide Murde Gct na-amrlz-zvzle nide, Mz nzrpi-krdr kx, “Gct, king lc nalu angidr zvz. X lr Arabia narkabzng gol kxpnapr bade.”

¹⁶ Krka'-ngrgr kx nrlanc nyzgrng nalvc-angidrngr dakxnzng. X nounc nyzgrng nadobeting na-apule nounc ngr drtc' kc Lebanon. X taon nyzgrng nayrbu mz leplz Na-apule nzyrukr nabr ngr nardzng.

¹⁷ King lc nadcpx zvz mz drtwr. X drtqde nayc zvz mz nzapu-krde nzti-zvzkr nepi. Murde sa nanginide nou nzamrlzkr Gct leplz amrlx mz nrlc, Mz nzkrlz-krdr kx matq-esz'ngr mz nzobqkr Gct.

Nabz Kx Yrkrpxngr Buk Krali

¹⁸ Naglqlzku Yawe, Gct r melrmqgung. Nide txpwz kxnzkctipx. Naglqlzku Yawe.

¹⁹ Navz navz zvz nzangiongr drtqde. Nzrglqlzngr nide navz navz zvz.

²⁰ Krlc me yrkrpxngr nabz x nzkrka'-ngrng kx yr King Devet, mrlx Jesi.