Sam 71 - Natqgu

Sam Kranzpnu-rlimz-nrade-esz' (71) Nzkrka'kr Kzdq Lrtzlvz Brti Drtwrnge Nim

¹ Yawe, mnc-xglex nim nztu-krme mz nibrnge. X bzkq rlrpx-ngrn nzaovxiokr enqmi rngeng ninge.

² Lalztqm bange mz nzokatr-krm ninge. X arlapx ninge murde tubq-esz'ngrn.

³ Nangini-kzp me rlakitrx mz nzmnc-kapqtr-krbo bam. Murde nim butqbr x lrpalvc nyznge.

⁴ Gct rnge, arlapx ninge mz mq leplz kxdrka'-ngrng, Kcng tzrpilr naodatilr ninge.

⁵ Murde nim, Kxetu Yawe, kx brti drtwrnge, yzutr pnz mzli kc tqngi-oblabe-ngrne. X sc tqvzbe nzabrtr-krbo drtwrnge bam.

⁶ Abzo mzli kc tzmcngr mzke', krlzmle mzli ka, mnc-xgletxpwo nim, Mz nzaclve-zvz-krm ninge. Delc naglqlz-zvz-ngrne nim.

Okatr-mop Ninge

⁷ Nzrpi leplz kx ninge rkx ngr da kxtrka, A' nim lrpalvc kxmqngi kx rlakitrx.

⁸ X glqlz-zvzx nim mz zbq kang kqlu, Mz nzyapwxtipx-krnge nzmyalz-esz'ngr-krm.

⁹ Delc kxmule-esz' nipenge lrtzlvz, a' bzkq drtqm satrp bange, X bzkq rlaszq ninge mzli ka tqyangrngape-ngrne.

¹⁰ Murde enqmi rngeng nzycmnetr-ngrdr ninge X nzryrlqpeng drtwr,

¹¹ Mz nzrpi-krdr kx, “Gct sc tqrlaszpele nide. Vzmamu, nalolvzpeku murde trpengr kx na-arlapxle nide.”

Arlapx Ninge

¹² Gct rnge, bzkq mnc-rlrume bange, A' vz-anim mz nzarlapx-krm ninge.

¹³ Aovxio x odati krkcng tzrpilr natzlr x na-atrkatilr ninge, Mz nzamyati-krbzme drtqdr x nzbatr-krbzme nzobqszokr leplz nidr.

¹⁴ Sa na-abrtr-zvzbo drtwrnge bam, X naglqlz-ebir-ngrne nim.

¹⁵ Kxmule-esz' da kcng tqaleq nzkqlu-zlwzng, A' mz zbq kang kqlu sa nayapwxtipxx nztubq-krm, x zmatq ngrm mz nzarlapx-krm leplz.

¹⁶ X sa navzbo bam mz nzglqlz-krnge zmatq ngrm, Murde nim txpwz kx tubq-esz'ngr.

Vz Zvz Nzpipx-krnge Nzmyalz-krm

¹⁷ Gct, alvztrq ninge, abzo mzli kc tqngi-oblabe-ngrne. X sc tqyapwxtipxbex da kx nzkctitxpx kcng tqwz-ngrn.

¹⁸ Mzli ka nipenge lrtzlvz x nqnginarnge prkipe, bzkq rlaszq ninge. A' mncm bange mz nzyapwxtipx-krbo zmatq ngrm mz nrpr ngr leplz amrlx.

¹⁹ Gct, nzetukr nztubq-krm krlzlzle bongavz. X trpnz-moungr kx apule nim kc tqaleti da kxetuting.

²⁰ X kxmule-esz' batrpe' nzetukr nzkxpu-krngeng, a' krlzx kx sa na-amrna-mowq nzlu-krnge, Mz nzarlapx-krm ninge mz gq.

²¹ Sa na-aetunepxbzme nzamatqkr leplz ninge, Mz nzaelalz-mou-krme drtwrnge.

Nabz Ngr Nzawingr

²² Gct rnge, nim Gct rgr, nigr lr Israel, x sa nangrbo bam mz nzayrni-krbo gita x ukzlele. Tr-esz'ngrn x sa naglqlzx nim murde ngida angidrme bagr.

²³ Sa namalq-katox mz nzabrtz-krnge, X mz nabznge atwrnrngr sa nangrbo bam murde arlapxpeq ninge.

²⁴ Mz zbq kang kqlu sa napipxbo nztubq-krm mz nzokatr-krm ninge. Murde krlcng tzrpilr na-atrkatilr ninge aovxiopeqng x drtqdr myape.