Sam 69 - Natqgu

Sam Kranzpnu-esz'mz-nrade-rpwxmz (69) Nzkxpukr Ncblo Kxwztr-zvzbz Mz Yawe Nabzpex

Nabz ne Devet kx yrbzle mz kxrmailz ngr dzbe kxnzngrng.

¹ Gct, pi-zvzbo bam kx, “Arlapx ninge!” Murde nzkxpu-krngeng nzaetunepxpeng. X apupex rplz kc namrbropebz mz nrlr.

² X apu-kzx kx twznede ninge drlr ngr nrc. X mz nzboo-krnge, nabzpex, murde trpnzngr me nakcblztr-ngrne.

³ Gct, drtqnge satxpe x drtwrnge kaatxpe mz nzkqle-zvz-krnge nim. Mzke' ngqbqtxtrpebz mz nzaenzli-zvz-krnge nzvz-krme.

⁴ Enqmi rngeng nzrpilr nanibqlr ninge murde nzxplr-zlwzng. X nzpxtxpx-krdr lc ninge trpnzngr noude. X nzkqlu-krdr nzmyaszpxlr nqnginarnge. Nzpokiatitrlr ninge mz nzrpi-krdr kx nakabo trau rde. ?A' myx kxnamu nzka-krbo trau r da kx tralewxu?!

Nzxtrnga-ngrdr Ninge

⁵ A' Gct, nim txpwz kx rkrlz alwx rngeng, Murde trnzyc-kapqpwzung bam.

^6-7 Yawe, nim Ngrlrvea r ami nem, X nim Gct r lr Israel. Nzatrkatilr ninge murde lxngitix nim, X nzamyati-zvz-ngrm drtqnge. A' bzkq rlr-ngrme bange nzamyati-krbo drtq leplz nemqng, Kcng tzlxngitilr x tzangiolr nim.

⁸ Murde apubo lr mrkzble mz lr mrnyznge, X mzlengeng nzmapulrtr-ngrdr ninge peto.

^9-10 Kxmule-esz' nzxtrnga-ngrdr ninge Nzaxtx-krnge dakxnzng mz nzavzo-lzbq-krnge, A' mz nzpq-zlwzkr nzaotikr drtwrnge Mangr-nzangiongr nim, Apusr-ngrde ninge da kx nzangc mz nyr x yrkrtxo. X natq kcng tzpikiti-ngrdr nim, Yrplatr-kzpqng bange.

¹¹ Nzyrpalelvzlr ninge Mz nzpxi-krnge lrpz ngr nzvzkr drtwr.

¹² Lr mztea nzpikitinedr ninge. X ncblo kxnzrmnqng nzngr-xtrnga-ngrdr ninge.

Arlapx Ninge

¹³ Yawe, arlapx ninge mzli kznike mrlzbz bam Mz nzmyalzkr zmrlz ngrm.

¹⁴ A' veclzm ninge mz mu ngr nzkxpu-krngeng. X arlapxbz ninge mz nzngyatikr drtwr enqmi rngeng ninge.

¹⁵ Bzkq rlrpx-ngrn nzyrlemikr drlr ngr nrc ninge, X bzkq botxo-alox mz nzbzlz-krmc mz gqpr.

^16-17 Yawe, ninge kxnzawz nem. Ayzlum natqnge murde aodu-zvzq ninge. X amrlz ninge murde yc mz drtwrm ninge. Bzkq mnc-rlrume bange. A' okatr ninge, murde nabznge talvzo.

¹⁸ Vzm bange X xpepxbz ninge mz mq enqmi rngeng.

Ayrplapx Enqmi Rngeng

¹⁹ Murde krlzq enqmi rngeng amrlx, Kxmu nzpibqti-krdr ninge x nzamyati-krmlr drtqnge.

²⁰ Nzobqszo-krdr ninge yrnibungr nabznge. Yrni-ngrne nzvzkr drtwrnge, A' trpnzngr kxnaokatrle x na-amqtrple drtwrnge.

²¹ A' nzrkamqng nange dakxnzng kxpiz, X mz nzbrlxkzkr drtwrnge, nzrkamqng mqnge waen kxrkx.

²² Yawe, kxmu nzmukr leplz lcng badr kztedrng Mangr-nzangiongr trtubqu mz nzobq-krm. Delc, tzrtxlvzlz-mou-ngrdr alwx ngrdrng x takitrde nzodati-krm nidr.

²³ Akcbz mztr, X ayangrnga-zvzbz nrkrdrtqdr.

²⁴ Ayrplapx nidr mz zngya ngr drtwrm, Kc tqapule nyr kx nangc-ngrdr.

²⁵ X batrpz nzbz-krdr, Murde ma nyzdr namznrtx-alongr.

²⁶ Rlxtibo bam da lcng murde ayrplapxpeq ninge, A' nzrtxlvzlz-moplr nzetqkr drtqnge.

²⁷ Delc alwx ngrdrng nartxlvzlz-kz-ngrdeng, Murde ma tzprtrng mz nzripqpx-krm alwx.

²⁸ Bzkq yroq drtqdr mz Buk ngr Nzlungr, Mrkc tqyclz-ngrm drtq kxnztubq nemqng.

Nzrglqlzngr Gct

²⁹ Gct, tangigx-zvzx mz nzetqkr drtqnge, Mzli ka tqaenzlix nzmnc-zpwxngr kc navzm mz nzarlapx-krm ninge.

³⁰ Murde na-angrlvzx nim, X naglqlzx nim mz nzawingr.

³¹ Murde sa na-abrtz-ngrm nzangio-krnge nim Namyaszlzle nzangc-krbo blz bam.

³² X leplz txneng na-abrtzng mz nzokatr-krm nidr, Murde apqtr-mopwzme nabzdr.

³³ Murde lalztqbzme mz kxtrnzrngiscung, X trmrbrtru mz drtwrm leplz nemqng kcng tzkxpung.

³⁴ Nimu bongavz x drtc' naglqpxamu Kxrpalz. Nimu prla x dalr prla amrlx naglqlz-kzamu nide.

³⁵ Murde sa na-arlapxle Mzteadau nyzde x sa na-atulz-moule mztea ngr Judz amrlx. X kxnzwztrpzng bade namncng elr x nangi nyzdr drtc'.

³⁶ X sa na-aprcbzle drtc' mz doa ne leplz nedeng, Murde leplz kcng tzmrlztilr nide namnc-zvzng elr.