Sam 68 - Natqgu

Sam Kranzpnu-esz'mz-nrade-rtqmz (68) Zmatq Ngr Gct Mz Nzaclve-krde Lr Israel Nzmyalzkr Gct

Nabz ne Devet kx yrbzle mz kxrmailz ngr dzbe kxnzngrng.

¹ Mz nzvz-krm Gct, enqmi rdeng nzodalitipeng. X kxnzpxtxpx-ngrdr nide nzdwaszlr nide.

² Milxtxole nidr mz nzapu-krdr zsikapu kc tqwqplx nenq. X nibqtile kxdrka'-ngrng mz nzapu-krdr kadol kc tqyrle mz nzngc-krde.

³ A' nigu kxnztubqng abrtzlvzku nzmnc-aepztr-krbzku bade, Mz nzbilvz-krgu x nzmalqlvz-krgu nide mz nzelangr.

⁴ Naglqlzku Gct mz nzangrlvz-krgu drtqde. Na-amyalzku nide kc tqvoom mz dcbz. Drtqde Yawe x na-abrtz-ngrgu nzmnctr-krbzku mz mzte.

⁵ Gct mnc Mangr-nzangiongr. Apubzle trte mz doa kxnzbzszng x aclve-kzle olvz kx nzbzszng ncblo ngrdr.

⁶ Kxnzmncng esz'-krdr amnctr-lxblr-kzleng mz neidung, X kx drtqdr tropxu vzmi-kzleng Murde namnc-zpwxng. A' krkcng tzesablqtilr nide, avzpx-nrbalqleng.

Mzli Kc Lr Jiu Tzrlasz-ngrdr Ijipt X Tzprtr-ngrdr Lzke

⁷ Mz nzrlaszkr leplz ne Gct Ijipt, vzmitrleng lzke. X mz nzmailz-krde nidr, mncpxm mz nyr x dcbz.

⁸ Nide Gct r lr Israel kc tqaelwapxle zmatq ngrde mz Newz Saenae. Murde mz nzvz-krmle, nengq x tewa kxnzetung nzvz-kzpqng.

Mzli Kc Lr Jiu Naprtr-ngrdr Mz Drtc' Kc Tqpibz Yawe Badr

⁹ Gct avzo-ngrmle tewa, Murde na-alu-moule drtc' nyzde kc tqmingrpe.

¹⁰ Neidu lrde kxtrnzrngiscung amncleng mz drtc' lc, Mz nzrka-krbzle badr da kx nzmnctxpx-ngrdr.

Mzli Nyz Kxnzryrlqng Drtwr

¹¹ Kxetu rgu Gct kapxle natq Kx olvz kxnzkqlung napipxlr nrpa lcde seng,

¹² “King x ami nedrng nzdwang. X nigr olvz akitikr dztu enqmi kcng tztwz ncblo ngr vea negrng.

¹³ Akitikr da kxlqngi kxlqlwx kx nzwzngr mz silvz x gol. ?Myx kxmule, kzdung nimu ncblo trnzprtr-ngrdru mz vea?

¹⁴ Murde Gct kc tqrninr milxtxole king kcng, X namz ngrdr nztwzbene-krdr apule lrdz kx lvxlz nrc mepz.”

Mzli Kc King Devet Tqyrlq-ngrde Jerusalem Mz Nzngini-krde Mzteadau Nyzde

¹⁵ Mzli kc King Devet tqyrlq-ngrde Mzteadau nyzde mz Newz Saeon, Newz Basan apule ncblo kx angya drtwrde nzyckr Mzteadau mrlc. A' Devet ayzlubzle natqde mz nzrpi-krbzle kx, “Newz Basan, kxmule-esz' matq-esz'ngrn x myatxlzq, X nra nyzmqng ngi rtrngr,

¹⁶ A' bzkq obqszoq newz kc tqmcpx Yawe kx namnc-ngrde, Murde sa namnc alo elr.”

Yawe Aovxiole Enqmi Rdeng X Vzdz Mangr-nzangiongr Jerusalem

¹⁷ Gct vom mz siu ngr sariot scdeng, Mz nzprpx-krmle mz Newz Saenae x nzprtr-krde Mangr-nzangiongr.

¹⁸ Kxetu vzdz-ngrde wq, X aovxiole enqmi kxkqlu. X nzkabzlr da bade, mz nzmetx-krbzlr bade, Kxmule-esz' kxnzxpqbrlr-ngrdr nide mzli kc.

¹⁹ Naglqlzku Kxetu kc tqatu-amqngile nigu mz zbq kang kqlu. Murde nide Mevalu rgu.

Mzli Kc Gct Tqnibqti-ngrde King Nede Ehab X Nqvi Lrde Mz Nzayrplapx-krde Nidr

²⁰ Gct rgu nide Gct kc tqarlapxle leplz. Yawe nide Kxetu kc tqkapxmle nigu mz mq enqmi rgung.

²¹ X sc tqtaputibzle nardr, Murde nzvz-rbr-zvzng.

²² Rpimle bagu kx, “Kxmule-esz' enqmi rmung nzdwalzng mz newz O drlve keng mz nzakitikr nrlc nidr, a' sa nayzlutibong.

²³ Murde navznenamu mz nzrnzlvzo-krmu mepyr ngrdrng, X kuli nemqng drtwrdr naesatxpx zpwx mz nzrmnq-krdrle.”

Nzakaputr-ngrm Nzamyangr Mz Mzli Nyz King Hesekaea

²⁴ Leplz amrlx nzmclr nzvztr-krmqng leplz neng Gct Mrkc Tqtr, Mz nzangrlvz-krdr Gct x King rdr.

²⁵ Dzbe kxnzngrng nzrtwayzbzng, vz-nqblqbz olvi kx nzelang x nzayrlewzng nrasrpwale. X kxnzayrning gita nzrmnr-ngrmqng.

²⁶ Kxmu nzngr-krdr nide sele, “Naglqlzku Yawe, nigu leplz nedeng, mz nzyrlwr-lxblr-krgu. Naglqlzku Yawe, nigu kcng tqngi nqvi lr Jekop.”

²⁷ Neidu lcng tzvz-kzpqng, Benjamin, Judz, Sebyulon, x Naftzli. Neidu ne Benjamin krkc tqtopwz rtwayzbz badr, X mz nibrdr kxnzetung r Judz x leplz nedrng. X rmnr-ngrbz neidu kx nzmncomqng mz nort, kxnzetu r Sebyulon x Naftzli.

Lr Jiu Nzkrka'-ngrdr Lr Mrkzbleng

²⁸ Gct, aelwapx-moungr zmatq ngrm, Kc tqaelwapx-ngrn tqokatr-ngrn nigr mzli kc.

²⁹ Kapxbz natq kx king kcng tqaovxiopeq nartwzmqng da bam, Mz nzmnc-krm Mangr-nzangiongr.

³⁰ Ayrplapx Ijipt kc tqapule trmwzlogo kc tqmnc-kapqpxm mz nabr kc tqlvcpulzm mz nqlvi lr Lue Nael, Ayrplapx nidr badr kztedeng murde mrlz-zvzbz badr nzotangr. Aodali lr mrkzble lcng, Navz navz nakrlzbzle mzli kc tzyrngzo-ngrbzlr bam.

³¹ Murde kxnzetung ngr Ijipt navzmqng bam, Nidr badr lr narnrlc amrlx kcng tzaxvctrng badr, X naxpeng trau, silvz, x da kxlqlwx Mz nzaovxio-krm nidr mz vea.

Nzmyalzkr Gct

³² Nimu lr nrlc amrlx, Nangrlvzamu Kxetu Gct.

³³ Murde sc tqvzne mz bongavz, kc tqwz-ngrde mzli kc bqnc. X nzxplrkr natqde apule natq bzlrmei.

³⁴ Napipxku zmatq ngr Gct, kc tqaelwapx-ngrde mz dcbz, X mz nzaclve-krde nigu lr Israel.

³⁵ Kctitxpx-zlwzku Gct rgu Mrkc Tqtr. X nide kc tqrkam bagu nzxplrngr x zmatq. Takitrde nzrglqlz-zvzngr nide.