Sam 65 - Natqgu

Sam Kranzpnu-esz'mz-nrade-nzlvqn (65) Kxaodu, Kxrpalz, Kxrka Kxaodu

Nabz ne Devet kx yrbzle mz kxrmailz ngr dzbe kxnzngrng.

¹ Gct, nzglqlz-krgr nim Jerusalem tubq-esz'ngr, X rpikr na-atutr-zpwxkr nzesalz-krbzkrng bam.

² Murde xlrme nzkrka'-krgr, Mz nzmnc-xgle-krgr nim.

³ X kxmule-esz' nzvz-rbr-krgrng nzmrilvzlr nigr, A' ipqpx zvz alwx rgrng amrlx.

⁴ Namrlz-ngrmle bagr, nigr kcng tqmcpxqng X tqvzmitrqng Mangr-nzangiongr nim. Murde sa namnc-zpwxkr Mz nzrtwzngr da kxmrlzting mz ma nyzm.

Kxrpalz

⁵ Mevalu rgr, mzli kc tqyrni-ngrbzkr bam, ayzlume natqgr Mz nzbatr-krme nzaovxio-krgr. Lr mrkzbleng nzmncng drtc' x trmctu mz nrlc tulvzo. X sc tzabrtr-kzpzlr drtwrdr bam.

⁶ Murde mz nzxplr-krm atulzq newz kxetuting, Mz nzaelwapx-krm nzmyalzkr zmatq ngrm.

⁷ Aoq nrwx mz nzyclwzkr srkau x aesakiq nzyrpukr natq nrc. X amnc-nabuq leplz kcng tzxpqbrlr-ngrdr nim.

⁸ Nzamrluengr nim mz nzetukr zmatq ngrm. X mz nrlc tulvzo nzmalqlvzlr da kcng tqaleqng.

Kxrka

⁹ Gct, aclve-angidrq nrlc mz nzadc-krm tewa, Murde dakxnzng nalvc angidr mz drtc'.

¹⁰ Tewa lc tqayayrtile drtc' nyzgr, Murde da kx petikr mz nrlanc nyzgr nalvcpulzmqng.

¹¹ Ycngr dakxnzng kxkqlu mrkcng amrlx tqvzkiq. X bxli scgrng yrbuti zvz mz da kxmrlzting.

¹² X abrtz-zlwz-ngrgr Nzmc-krgr nzplckr nra nounc nyzgrng.

¹³ Angrlvzkr nzyrlvzbqtikr animol negrng, X malqkr murde nrlanc nyzgrng brtipeng x ycpe pipz nzrkqlzngr.