Sam 63 - Natqgu

Sam Kranzpnu-esz'mz-nrade-tq (63) Sutitx Zlwz Drtwrnge Nzxplr-krm

Nabz ne Devet mzli kc tqmnc-ngrde lzke ngr Judz.

¹ Gct rnge, rtangrtix nim. Murde nim kc tqbatrple nzesatxpx-zpwxkr drtwrnge. Apux ncblo kx drtwrde brlxkz x mzte tclvr mrkc lzke, Mz nzsutitx-zlwzkr drtwrnge nzmnctr-krbo bam.

² Suti drtwrnge nzxngi-krbo nzulrm Mangr-nzangiongr Mz nzmc-krnge zmatq x zluli rm.

³ Nzkrlz-krnge nivz lrm myaszpx-zlwzle nzlu-krnge mz nrlc. X glqlz-zvzx nim mz nzaodu-zvz-krm ninge.

⁴ X sa na-awi-zvzbo bam Mz nzglalz-krbo mqnge mz nzkrka'-krbo bam.

⁵ Drtwrnge sa naesatxpx zpwx nzmnctr-krbo bam. X sa na-angrlvzx nim mz nabz kxyrlvi.

⁶ Mz nrlckxbq kang kqlu aoti zvz drtwrnge nim, Vz vz nrlc ngrlxtxpx.

⁷ X angrlvzx nim mz nzabrtzngr Murde okatr-zvzq ninge x tu-zvzme mz nibrnge.

⁸ Mnc-amqngitrpo bam, X lolvz-amqngiq ninge mz mqm kx xplr.

⁹ A' ayrkrtxong mz drtc' Krkcng tzrpilr nanibqlr ninge.

¹⁰ Nibqting nidr mz vea, Murde kuli kzpeto nangqtilr namz ngrdr.

¹¹ X ninge, king nem, sa na-abrtzlvzx nim, Murde ngi-batrpe' nzaovxio-krnge. X krkcng tzabrtrpzlr drtwrdr bam, sa nabilvzlr nim. Murde sa nangi-batrpzme mz kxnzpokiang nzmnc-lrpi-krdr.