Sam 62 - Natqgu

Sam Kranzpnu-esz'mz-nrade-li (62) Mnc-xgle-zvzku Gct Txpwz Mnc-xgleamu Gct

Nabz ne Devet kx yrbzle mz kxrmailz ngr dzbe kxnzngrng.

¹ Gct txpwz kx mnc-xgle-zvzx mz nabznge, Murde nzmnc-zpwx-krnge vzpxm bade.

² Nide butqbr nyznge x mevalu rnge. Nide lrpalvc nyznge kx tu-amqngio-ngrne.

³ Delc nimu kxdrka'-ngrng bzkq tz-zvzpeamu ninge mzli ka trxplrpewxu. X bzkq apusr-ngrnamu ninge nzawxo-krmu ma kx blzlongr.

⁴ Ryrlqamu drtwr ngr nzapotxo-krmamu ninge me matq kc tqmnco-ngrmc. X abrtzlvzamu nzpokiatitr-krmu ninge. Murde nivz lr naomu prlxmamu bange, A' mz nabzmu la, ngyati drtwrmu ninge.

Na-abrtxtrpwzmu Drtwrmu Mz Gct

⁵ Gct txpwz kx mnc-xgle-zvzx mz nabznge, Murde nzmnc-zpwx-krnge vzpxm bade.

⁶ Nide butqbr nyznge kx abrkitrx drtwrnge. Nide lrpalvc nyznge kx tu-amqngio-zvz-ngrne.

⁷ Nzarlapx-krnge x nzmrlue-krnge yctr txpwz bade, Mz nzngini-krde butqbr nyznge kxmqngi kx rlakitrx.

⁸ Leplz nengeng, mz nzangidati-krbzle da kx yc mz drtwrmu, na-abrtxtrpwzmu drtwrmu bade. Murde nide txpwz me rlakitrku.

Bzkq Brti Drtwrmu Doa O Da Kzbleng

⁹ A' bzkq brti drtwrmu leplz, murde nigu amrlx apu-txpwzku zsikapu, Kxmule-esz' nigu kxnzetung o leplz txneng. Murde nzmu na-arsakrlrku nzmrlekr Gct x nigu, Nide kx mrle txpwz, a' nginigu da-nrbalq.

¹⁰ X mz nzrtwz-krmu da kx suti drtwrmu, bzkq brti drtwrmu nzamwxlr-krmu leplz x nzpna-krmu dztudrng. X kxmule-esz' nimu bcnyrng, bzkq abrtrpzmu drtwrmu mz trau scmu.

¹¹ A' na-amqtrku drtwrgu mz nzxlr-krgu natq lcng. Murde Gct txpwz kc tqmatq.

¹² X da kx myapxbz, nzaodu-krde nigu tresakiu. Rpimle kx, “Mzli lcde, nzayzlu-krbo da mz doa navz-nqblqle da kx aleleng mz nrlc ka.”