Sam 58 - Natqgu

Sam Kranzpnu-nzlvqn-nrade-rtqmz (58) Kxdrka'-ngrng Nzapulr Ningidoe Kcng Tzrmakxng Kxnzetung Kxdrka'-ngrng

Nabz ne Devet kx yrbzle mz kxrmailz ngr dzbe kxnzngrng.

¹ ?Kxnzetung, myx kxmule, nzaclve-krmu tubq, X rsakrlrngr angidr?

² Trtingr! Murde yrlqamu drtwr kx atrkatile leplz nemung, Mz nzaetq-krbzmu drtqdr mz nrlc ka.

³ Nimu kxdrka'-ngrng. X ale-zvzamu da kxtrka, Yzuo pnz mzli kc tzmcngr mzpu.

⁴ Apuamu ningidoe kcng tzrmakxng Mz nzatrkati-krmu leplz.

⁵ X apu-kzamu kxnradrtqdr ngq murde pxtxpx-zvz-ngrnamu nzxlr-krmu nzyrni-krdr, X nzayzlu-krbzmu natqdr.

Nzayrplapxkr Gct Kxdrka'-ngrng

⁶ Yawe, ayrplapx leplz lcng tzapulr ningidoe, mz nzyrvilz-krme nipna scdr. X mz nzapu-krdr poi kz peto, taglctr-kzpz nqngidr.

⁷ Mrlzvxitx nzbatr-krbzme nzmyakr nipna scdr, X nzmrbr-krdr na-apule lue kc tqmrbrlqo mz drtc'.

⁸ X mrlzvxi kz nzapu-krdr zwqwq r wagq kc tqlrprnebz mq mz nzngrla-krde x mz nibrde sc tqmrbrpe mou mz nztiokr nepi le. X na-apu-kzlr itoto kx bz murde nzmika mzli kc tqpoobe-ngrde.

⁹ Gct, mzli kc tzlube-ngrdr, apusrngr nidr nabr kc tzikzti, Mz nzodati-krm nidr mz zngya ngr drtwrm.

Nzabrtzkr Leplz Neng Gct

¹⁰ Zbz nigr kxnztubq nemqng sa na-abrtz-zlwz-ngrgr nznibqti-krm kxdrka'ngr lcng. X sa naelalvzkr nzyrlekr mepyr ngrdr.

¹¹ X sa napibzkr bam kx, “Gct, da zpwxtx! Sa nakabzme da kxmrlzting mz leplz kxnztubqng, Murde nzaclve-krm lr nrlc tubq-esz'ngr.”