Sam 57 - Natqgu

Sam Kranzpnu-nzlvqn-nrade-rlimz (57) Batrpz Mz Lr Nrlc Tulvzo Nzmc-krdr Nzaovxio-krm Nayc Mz Drtwrm Ninge

mzli kc tqrlatr-ngrde mz butqbr mz nzdwasz-krde King Sol.

¹ Gct, nayc mz drtwrm ninge mz nzaelwa-krme bange nzmrlz-esz'ngr-krm, Murde mnc-xglex nim mz nzmnc-zpwx-krnge mz mzlir nzkxpungr kxtrka. X na-apux nei bona kc tqmnclzbz mz nabx lxede, Mz nztu-krme mz nibrnge, navz navz mzli kx ayrkrpx-ngrn nzodangr.

² Gct, myalz-esz'ngrn, x sa nakqlex nim, Murde angidati-zvzq me pnz drtwrm mz nzmnc-krnge.

³ Sa na-ayzlume natqnge Heven mz nzarlapx-krm ninge. X na-amyatibzme drtq krkcng tzrnzlvzolr ninge. Murde aodu-zvzq ninge, X angidati-zvzq natqm.

Nzrtxtiolr Ninge Br

⁴ Nztu-ngalelvzlr ninge ncblo ngr nzodangr. Spiz x nipna scdr nzapulr nqngi kx malc, X natqdr nzaetq-krdr drtq apule nzrluplxtikr toki r vea.

⁵ Lr Heven namclr nzmyalz-esz'ngr-krm. X lr nrlc namclr nzaovxio-krm.

⁶ Kxmule-esz' nabznge talvzo zlwz murde enqmi rngeng nzrtxtiolr ninge br, A' awi Gct, kx naprtz-moung mz trtxki kx nzamwiti-ngrdr ninge.

Sa Na-angrlvzx Nim

^7-8 Sa na-angrlvzx nim mz nabznge atwrnrngr mz nzayrni-krbo gita bam. Murde abrtr-zvzbo drtwrnge bam. Nilz r nepi adwalzmle ninge mz zbq kang kqlu. A' mz nzdwalz-krmc mz nourla kx topwz, Na-apule nabz nenge adwalzmle nepi, Mzli lc naglqlzpex nim.

⁹ Kxetu, sa na-awibo bam mz mzlir lr mrkzbleng, X na-angrlvzx nim mz mzlir neidung.

¹⁰ Murde nzaodu-zvz-krm myalz krlzlzle bongavz, X nzangidati-zvz-krm natqm.

¹¹ Lr Heven namclr nzmyalz-esz'ngr-krm, X lr nrlc namclr nzaovxio-krm.