Sam 51 - Natqgu

Sam Kranzpnu-nzlvqn-nrade-esz' (51) Nabz Leplz Kx Avzo-lzbq Wztibz nabznge

kx yrle mz nibr nzycmne-plztitr-krbz Profet Neitzn mz nzmwimi-krde Batsibz.

¹ Gct, nayc mz drtwrm ninge, X atubqtim nzvz-rbr-krngeng, murde aodu-zvzq ninge.

² Wztibz nabznge mz alwx rngeng amrlx Kcng tzatrkatilr ninge.

³ Murde opxpe mz mzke' nzvz-rbr-krngeng. X plzpxbo nzesablqti-zvz-krnge nim,

⁴ X myapxbz nim kc tqxpqbrlr-ngrne Mz nzrnzlvzo-krnge Loukxtr scm. Delc, tubqq mz nzrpi-krme bange kx vz-rbrx, X mz nzyrlq-krm nzayrplapxngr ninge.

Ipq Ninge

⁵ Mrlzm bange nzale-krnge alwx Murde mzli kc tqmncbe-ngrne mz nelz lxenge, alwx rnge ycpebz.

⁶ A' suti drtwrm kx nabznge navz-nqblqle nzmncngr angidr. Delc, na-alvztr-ngrn ninge murde nayrplapxx.

⁷ Wzti-angidrbz nabznge, Murde nzprki-krnge namyaszpxle nqbya r nrc.

⁸ Ipq ninge murde na-abrtzx, X drtwrnge kc tqavzbzme naelalz-mop.

⁹ Bzkq obqtrpeq nzmyakr drtqnge mz alwx rngeng, A' ipqpxbz alwx rngeng amrlx.

Tekqtrpz Nabznge

¹⁰ Gct, tekqtrpz nabznge murde natubqx, X amrnale mqngrnge murde navz-nqblqx nim.

¹¹ Bzkq maszlrpx-ngrn ninge mz nzmnctr-krbo bam. X bzkq katxpxq nzokatrkr Mqngrm ninge.

¹² Okatrp ninge murde na-abrtz-mou-ngrne nzarlapx-krm ninge, X drtqnge navq mz nzvz-nqblqngr natqm.

¹³ Zbz sa na-alvztrpo nqmq krmqng mz kxdrka'-ngrng, Murde nayzlu-mopwzlr bam.

Nawztrpo Bam

¹⁴ Gct, bzkq ayzlu-mope' bange nzrnibq-krnge ncblo, Murde na-angrlvzx nim mz nzarlapx-krm lc ninge.

¹⁵ Kxetu, okatrp ninge Murde naglqlz-ngrne nim nivz lrm.

^16-17 Trabrtz-ngrwq nzangco-ngrm blz mz olta nyzm. A' blz kx mrlzbz bam nabz leplz kx avzo-lzbq x plzpxle alwx ngrdeng. Delc trna-angco-ngrpwc'u blz mz olta nyzm, A' avzo-lzbq-zvztxpwo bam.

Blz Kxtubq

¹⁸ Krka'-ngrbo bam kx naokatrpe' nigr leplz nemqng Mz nzamqngi-mou-krgr drkq ngr Jerusalem.

¹⁹ Murde nzangco-krmgr blz mz olta nyzm navzpxm mz nzka-lzbq-krbzkr bam. X krlc blz kxtubq mz nzobq-krm.