Sam 50 - Natqgu

Sam Kranzpnu-nzlvqn (50) Blz Angidr Nangi Nzawi-ngrbz Mz Gct Nzyrlwrkr Leplz Neng Yawe

Nabz ne Asaf.

^1-3 Yawe, nide Gct kc tqxplr esz'ngr. X zluli rde pnamilxtile mzteadau Jerusalem kc tqlqngi. A' nrlc ycngrlrlzm mz nzvz-krmle, Murde nyr wounepx kai mz nzangc-krde da amrlx, X nounenq o-ngalelvzle nide. X kqlele lr Heven mz nzayrlwr-lxblr-krdr leplz amrlx mz nrlc.

⁴ Navzmqng mz nzmc-krdr nztubqkr natqde, Mz nzpipx-krde nzvz-rbrkr leplz nedeng.

⁵ X rpibzle mz lr Heven kx, “Vzmimamu krkcng tzlxngitilr ninge, X drtwrgr badr tqesz'ti mz nzangc-krmlr bange blz krdr, murde nayrlwr-ngalelvzlr ninge.”

⁶ X lr Heven nzrpilr kx, “Gct, nzaclve-krm rsakrlrngr. Murde tubqq mz nzryrlq-krm drtwr.”

Gct Atubqtile Leplz Nedeng

⁷ Rpi Gct kx, “Leplz nengeng, xlrmamu natqnge. Murde ninge Gct rmu x na-aelwa-ngrbo mrkc tqvz-rbrtiamu.

⁸ Animol kc tqngi blz tqkamamu bange, trngiu da kx myapxbz, Mz nzangco-zvz-krmamuleng mz olta.

⁹ X trngi-kzu da kx myapxbz nzangc-krmamu bange Gout x kzu kxncblongr dalr nardzng nyzmu.

¹⁰ Murde dalr peto amrlx nyzngeng, X wai-kzle kzu amrlx kcng tzmncng mz siu r newz.

¹¹ Utc ngr peto amrlx nengeng, Nidr badr animol ngr nardzng.

¹² Nzmu nabrtalex x drtwrnge brlxkz tr-rlxpwc'u bamu da. Murde nrlc nyznge x dalrdeng amrlx.

¹³ X trmuwxu ncvr kzu. X tr-rmnqwxu mepyr ngr gout.

¹⁴ A' blz angidr nangi nzawi-krmamu bange, X nzangidati-krmu da kx esalz-ngrmamu bange.

¹⁵ X mrlz nzkrka'-krmamu bange mzli kc tqkxpu-ngrnamu, Murde naglqlzamu ninge kalr mz nzarlapx-krnge nimu.”

Alwx Ngr Kxdrka'-ngrng

¹⁶ A' rpibz Gct mz leplz kxdrka'-ngrng kx, “Trtakitrdeu nzyapwxti-zvz-krmu Loukxtr scnge, Mz nzycmnetr-krmu Nzryrngrkxtrng.

¹⁷ Murde pxtxpx-ngrnamu nzatubqti-krnge nimu, X rtctx-ngrnamu natqnge.

¹⁸ Alwx ngrmung nidr seleng: Mrlzbz bamu nzngi-kzte-krmu ncblo kx pna da, X nzprtr-ngrbz mz leplz kcng tzrmwimi-abeaneng leplz kx trngiu krnalzdr.

¹⁹ Ycmnetrpwzmu mz da kxtrka, X naomu tresakiu nzrpi-twzti-krdr da kx nzesabrtingr.

²⁰ Pikiti-zvzamu kztemung, X pibqti-kzamu mzlemung.

²¹ Mz nzale-krmu da lcng sc tqmnc-lrpinebo. X rpiamu mz drtwrmu, mrlzm bange nzale-krmuleng. A' trtingr! Murde da kcng tqvz-rbrtiamu delcng tqaplxtipx-atebo bamu.

Yawe Sa Na-ayrplapxle Leplz Kalr

²² “Mzli ka natekqtramu nqmq krmu, Murde ma tqodatitxne nimu X sc trpengr kx na-arlapxle nimu. X bzkq mrbrtr mz drtwrmu nzamatq-krmu ninge.

²³ Blz angidr nangi nzawi-krmamu bange. Murde narmctiamu nzarlapx-krnge nimu, mz nzvz-nqblq-krmu ninge.”