Sam 45 - Natqgu

Sam Kranzpnu-pwx-nrade-nzlvqn (45) Nabz Ngr Nzyrlzkr King Kc Tqmyalz-esz'ngr Natqngeng

Nabz ngr nivz kx nzyr nqvi lr Kora.

¹ King rnge, krlc nabz nenge kx nangr-ngrbo bam. Nabznge esz'ngr natq kxmrlzting. X nzngqpx-krm natq mz naonge Apule nzyrlepx-krm lue mz butqbr.

² Nzobq-krm lqngipx-esz'ngr. X natq ngr nzamrlzngr ngqpx-zvzm mz naom. Delc tqamrlz-zvz-kzngr Gct nim.

Nim King Kx Xplr

³ Nim ncblo kxmyalz-esz'ngr x xplr zlwz mz nzotangr. Alvco toki r vea scm mz bxli rde kc mz nrkalom.

⁴ Murde kalr mz nzvo-krm mz vea na-aovxioq enqmi rmqng mz nzxplr-krm. X nalolvz-amqngiq da kxtubq x leplz kxnzavzo-lzbqng mz zmatq ngrm.

⁵ X nipna scmqng natu x nalvctrng mz lomr enqmi rmqng, X lr mrkzbleng amrlx namnclzbzng bam.

X Kxnzmcpx

⁶ Nzyrlqkr Gct lc nzngini-krm King tqyc tqyc, Mz nzaclve-krm leplz nemqng mz nzmncngr kx tubq-esz'ngr.

⁷ Mrlzbz bam da kxtubq, a' px-ngrn da kxtrka. Dekc Yawe, Gct rm, tqmcpxpe-ngrde nim mz nzmyaszlz-krm kztemqng. X tqglqlz-ngrde nim, Murde na-aelule nim tolo ngr nzabrtzngr.

⁸ Lrpzmqng nzaeluti zvz mz tolo kx mnrte mrlzvxi. X ncblo sc tzayrnibzng gita bam Murde na-aelalzmle drtwrm, Mz nabz ma nyzm kx mzte luli-esz'ngr.

⁹ X olvi kc nangi kwin ngrm tutrpz mz nrlarm kxrtc, nzangrlopliti da kx nzwzngr mz gol kxpnapr. Olvi lc nide kzdq inyx king kcng tzmncng ma nyzm.

Olvz Rm

^10-11 Nim la nanginim Kwin. Lalztqm bange x aclvetio-lzbq. Mzli kznike ncblo ngrm suti-zlwzngr drtwrde nim mz nzlqngivxikr mzpq, Mnclzbz bade mz nzngini-krde King x Kxetu rm. X bzkq matq-zlwzpe mz drtwrm trtem x kxnginimqng.

¹² Kxmule-esz' lr Taea nzrkabzng da kxlqlwx bam, A' bzkq nzbatrpzlr nzrnzlvzo-krm me pnz drtwr ncblo ngrm, kc tqngi king.

¹³ Mzpq lxngipx-esz'ngr mz nzprtr-krm ma nyz king. X lrpzmqng nzkxsilvztitr gol.

¹⁴ Nim kc tqkq lrpz kxluli nzvzmibzlr nim mz king. X kztemqng kx nzmnc-kamelrng nzvz-nqblqlr nim, mz nztutr-krbzmu mz mzte.

¹⁵ Mz nzprtr-krmu lc ma nyzde, Drtwrmu elalzm x abrtz-zlwzamu.

Mrlxmqng

¹⁶ King rnge, doa ncblo kcng mztr namc mz nqvi lrm sa nangini-kzdr king, da kc tzwai melrmqdrng mzli kc. X nangi-batrpzme nzaclve-atwrnr-krdr drtc' nyzm.

¹⁷ Nabz nenge sa narkatrpz nabztq mz leplz nzamatq-zvz-krdr drtqm, X nzglqlz-krdr nim tqvzpe tqvzpe.