Sam 41 - Natqgu

Sam Kranzpnu-pwx-nrade-esz' (41) Yawe, Krka'-ngrne Kx Nayc Mz Drtwrm Ninge Kxnzokatrng

Nabz ne Devet kx yrbzle mz kxrmailz ngr dzbe kxnzngrng.

¹ Namrlzbz mz doa kcng tzmrlztilr leplz kxnzmaneng, Murde Yawe sa naokatrle nidr mzli kc nakxpu-ngrdr.

² Sa na-aclvebzle nzlu-krdr. X trtxpnzngr nzrlr-krbzle nidr mz mq enqmi rdrng. Delc tzrpi-ngrbz kx Yawe amrlzpele lr mrnyzdr Israel.

³ Sa naokatrng Yawe mz nzamrlz-mou-krde nrkrdrtqdr Mzli kc nayagox-ngrdr.

Enqmi Rngeng

⁴ Yawe, krka'-ngrne kx nayc mz drtwrm ninge X na-amrlz mou ninge. Zyagox kc tqycpxm mz nabznge Vzpxm mz alwx rngeng kcng tzatrkatilr nim.

⁵ Enqmi rngeng nzpibqtilr ninge, Nzrpilr kx, “?Myx mzli kx nabz-ngrde, murde namrbrtxtr mz drtwr nide?”

⁶ Kzdung leplz lcng tzoklatimlr ninge, nzpokiatilr kx nzyc mz drtwrdr ninge. A' nzrpilr nakrlzlr kxmu nzkxpu-krnge, murde nayapwxtinedr mz mztea amrlx.

⁷ Nztrkati nivz lrdr ninge nzpikiti-lrpi-zvzlr ninge. X nzaoti txpwz drtwrdr da kxtrka kx nadwatimle ninge.

⁸ Nzrpi-awalr kx, “Mrlztxpe! Mzli ka prtilz-zlwzpe zyagox kxtrka, X mzli trnaboiu x sc tqbzpe.”

⁹ Mzli ka, kztenge kc tqabrtr-zlwzbo drtwrnge bade, X tqmukr ncdr, nipe-kzde enqmi rnge.

Nzokatrkr Gct

¹⁰ Yawe, krka'-ngrne kx nayc mz drtwrm ninge. Amrlz-mopwz nrkrdrtqnge murde na-ayzlu-mopwc' da kcng tqtrka tzalemlr bange.

¹¹ X mzli kc trna-aovxio-ngrdru ninge, Sa nakrlz-angidrpex kx abrtzlvzq ninge.

¹² Sa naokatrq ninge nzale-krnge da kxtubq, X namnc-alotrpebo bam.

Nabz Kx Yrkrpxngr Buk Kc Kai

¹³ Naglqpxku Yawe, Gct r lr Israel. Mzli ka x tqyc tqyc, naglqpxku Yawe.