Sam 40 - Natqgu

Sam Kranzpnu-pwx (40) Nim Lrpalvc Kx Mncpx-ngrmc Xlrme Nzkrka'-krnge

Nabz ne Devet kx yrbzle mz kxrmailz ngr dzbe kxnzngrng.

¹ Yawe, sc tqaenzli-lrpipebo bam nzokatr-krm ninge. X mzli kc tqkqle-ngrne nim, xlrme nzkrka'-krnge.

² Veclzme ninge mz gq ngr nzbzngr x mz nabz mu kxrluo. Atuome ninge mz rplz kxetu, x trpengr doa x da kx namwxlrtix.

³ Alvztrpe' bange kc nabz kxmrna mz nzrglqlzngr nim. X mzli kc naxlrngr leplz nzngr-krngele, sa na-angiolr nim x na-abrtrpzlr drtwrdr bam.

Abrtrpo Drtwrnge Bam

⁴ Namrlzbz mz leplz kcng tzabrtrpzlr drtwrdr bam, Krkcng trnzprtrpwzung mz leplz kcng tzglqpx-lzbq-ngrdr x tzpokiang.

⁵ Yawe, nim Gct rgr x trpnzngr kx apule nim. Aleme bagr da kxkqlu mz nzatutr-krm drtwr kx yrlqq mz nzamrlz-krm nigr. Drtwrnge yrpz'trpz nzrlwxngr da lcng amrlx, Murde nzkqlu-zlwzng.

Ka-lzbqbo Bam

⁶ Trsutiu drtwrm nzrka-ngrbz bam dalr nrlanc ayrnrngr x dalr nzrkatxngr alwx. X tr-rlx-kzpe'u blz x animol kx na-angcom mz olta nyzm. A' da kx suti txpwz drtwrm nzxlr-krbo natqm, Murde narlrpx-ngrbo nrkrdrtqnge bam.

⁷ Delc tqrpi-ngrbo bam kx, “Ninge kape. Na-atutrx natq kcng tqyclzm mz Nzryrngrkxtr.

⁸ Gct rnge, abrtzlvzx nzale-krnge me pnz drtwrm, Murde nabznge lolvz-amqngipele nzalvztr-krmqng.”

Nzyapwxtipx-krnge

^9-10 Yawe, trnayrlq-kapqpou nzaodu-krm x nzangidati-krm mz leplz nemqng. A' sa napipx-zvzbo nrpa ngr nzarlapx-krm nigr Mz nzyrlwrpx-lxblr-krgr. X krlzq kx vz zvz nzpipx-krngele.

Trmnc-zpwxwxu

¹¹ Yawe, krlzx kx yckqti zvz drtwrm ninge. X nzaodu-krm x nzangidati-krm nzngini-zvzmlr lrpalvc kx mncpx-ngrmc.

¹² A' mzli ka, rblx nzrlwx-krnge nzkxpungr amrlx kx nzprtztimqng bange. X alwx rngeng nzmrilvzolr ninge x nzayc-kapqmlr bange da kxtubq. Murde nzkqlu-zlwz-krdr nzmyaszpxlr nqnginarnge. X nabznge tqtalvzo-zlwz-ngrde.

Krka'-mopwo Bam

¹³ Yawe, vz-anim mz nzarlapx-krm ninge. Kxetu, rnekim mz nzokatr-krm ninge.

¹⁴ Okatrp ninge nzaovxio-krnge kxnzrpilr naodatilr ninge, Murde drtqdr namya x naobqszong mzli kc nadwasz-ngrdr ninge.

¹⁵ X leplz lcng tzxtrnga-ngrdr ninge nelzdr navzdzm Mzli kc nametx-ngrmlr bange.

¹⁶ A' amrlz krkcng tzbrti drtwrdr nim Mz rka-krbzme badr nzabrtz-zlwzngr, Murde na-awi-zvz-ngrbzlr bam nzarlapx-krm nidr Mz nzrpi-krbzlr kx, “Gct, nim kx myatxlz-esz'ngr.”

¹⁷ Kxetu, trxplrwxu x trpnzngr scnge zmatq. Bzkq mrbrtr mz drtwrm ninge. Murde nim txpwz Mevalu rnge. Bzkq asaq nzokatr-krm ninge.