Sam 39 - Natqgu

Sam Kranzpnu-tq-nrade-rpwxmz (39) Nzlukr Leplz Mrbcnepwz Apule Nzyrplaokr Nrc Kxesz' Nzlu-krnge Mrbcnepwz

Nabz ne Devet.

¹ Yawe, pnzpe drtwrnge kx namnc-lrpitxpwo, a' bzkq alex alwx mz nzlctr-krbz drtwrnge bam mz nzkxpu-krngeng. Murde kxdrka'-ngrng lcng tzmnc-aepztrpqng bange, ma tzxtrnga-ngrdr nzlqngi-krm.

² X kxmule-esz' trycmnewxu, A' nzkxpu-krngeng etunepx zvz, delc tqtalvzongr nabznge.

³ X mz nzaotikr drtwrnge nzkxpu-krngeng, nztalvzokr nabznge mrilvzole ninge. X mzli kc tqrblxm bange nzmnc-lrpi-krnge, sc tqrpipebo bam kx,

⁴ “Yawe, nzlu-krnge mrbcnepwz. ?Memule tqpxlavxpx-ngrbzme nzkxpu-krnge? ?Myx mzli kx naesakingr trnzmnc-zpwx-krpwc'u lc?”

⁵ Murde nim kx amrbctrp nzlu-krnge. X mzli kx lutix ngi da txne mz nzobq-krm. Nzlukr leplz mrbcnepwz apule nzyrplaokr nrc kxesz'.

Bzkq Ayrplatipx-zvzq Ninge

⁶ Nzwz-katongr ngi brmrdakr apule nounc kc trpnzngr nrade. X mz nzbzkr leplz trpnzngr dztudrng kx natwzlr.

⁷ ?Kxetu nike naobqtipxx mz nzmnc-krnge lc tqngi brmrda? Mwx namrlz nzbrti-zvzkr drtwrnge nim.

⁸ Murde na-arlapxq ninge mz alwx rngeng amrlx, X kxnzlukurnrng ma tzyrpalelvzlr ninge.

⁹ Mzli ka, dcpxpe mz drtwrnge kx vz-rbrx nzlctr-krbz drtwrnge bam mz nzkxpu-krngeng. Murde tubq nzayrplapx-krm ninge mz alwx rngeng.

¹⁰ A' bzkq ayrplatipx-zvzq ninge, Murde ycpe pipz nzbztr-krbo mz mqm.

¹¹ Mz nzayrplapx-krm leplz, odatibzme dztudrng kcng tqmrlzbz badr. Apusr-ngrbzmeleng da kx yrti ninr, Murde nakrlzlr kx nzvz-rbrng mz nzobq-krm. Nzlukr leplz mrbcnepwz apule nzyrplaokr nrc kxesz'.

¹² Yawe, xlrm nzkrka'-krnge x nzyrni-krnge. Murde nzmrbckr nzmncngr mz nrlc apunepwzle nzwoukr betepu.

¹³ Ayrkrtxpx nzetqkr drtqnge x aotxpxbz drtqnge, Murde mwx na-abrtztx-kaix mzli kxpipz x ninge kc tqbz ate.