Sam 38 - Natqgu

Sam Kranzpnu-tq-nrade-rtqmz (38) Zmrlepu R Alwx Rngeng X Nzatrkatikr Enqmi Rngeng Ninge Alwx

Nabz ne Devet.

¹ Yawe, kxmule-esz' ngyati drtwrm ninge, A' bzkq ayrplapxq ninge.

² Murde nipna scmqng tupe bange, X pnzplrope-ngrn ninge.

³ Xngitxtr-zlwzpex nzngyatikr drtwrm ninge. X yangrnga-zlwz-ngrne alwx rngeng.

⁴ Zmrlepu r alwx lcng sc tqayrngzpupele ninge, X apupex ncblo kx boo mz alwx ngrdeng.

⁵ Nzngqngu-plxsr-krnge aetqpemle drtqnge, Apule kxsqki kx mibi x brtu.

⁶ Alwx rngeng nzyrlamyro-ngrdr ninge. Delc drle mzke' tqtao zvz mz zbq kang kqlu.

⁷ Nzyagox-krnge apule nyr kx ngcpxm mz nrkrdrtqnge. X nzxplr-krnge yrkrtxpxpebz.

⁸ Nzetqkr drtqnge wibrti-zlwzpe-ngrde ninge. X bztipenge nzyrningr murde drtqnge rkrkx-zlwzpe.

Zyagox

⁹ Yawe, krlzpeq da amrlx kcng tqpq zlwz mz drtwrnge murde namnc-zpwxx. X xlrpe-kzpe' nzyrke-zlwz-krnge.

¹⁰ Mzli ka drtqnge mewepe x nzycmini-krnge vz-ebirpengr, X mzke' obqkipele mrkzble.

¹¹ Kztengeng nzngangrpe-ngrdr ninge murde kxsqki rngeng. X kxnginingeng trnzesotrpepqngqu bange.

¹² Krkcng tzrpilr nanibqlr ninge, Nzamwipelr trtxki rnge. X krkcng tzaetqmlr drtqnge, sc tzrpilr naodatilr ninge. X sc tzryrlq-zvzng drtwr mz nzatrkati-krdr ninge.

Enqmi

¹³ A' opxm kx trxlrwxu nzycmnekr enqmi rngeng. X trkrlzwxu nzycmnengr.

¹⁴ Eu, apubo badr kx nradrtqde ngq, X trayzlupwc'u natqdr.

¹⁵ Murde nim Yawe kx na-ayzlubzle nike nzalemlr bange, Mz nzngini-krm Gct rnge kc tqabrtrpo drtwrnge bade.

¹⁶ Bzkq rlr-ngrbzme nzabrtzlvz-krdr nzetqkr drtqnge. X bzkq nzglqpx-lzbqng mz nzaovxio-krdr ninge.

¹⁷ Murde ycpe pipz nzodati-krdr ninge, X nzetq-zvzkr drtqnge tryrkrtxpxpeu.

¹⁸ Naplztxpxx nzvz-rbr-krngeng, Murde nzbatrplr nzkxnekr drtqnge.

¹⁹ Enqmi rngeng nzxplrng x nzlu-zpwxng. X nzkqlung kx nztrkati nivz lrdr ninge.

²⁰ Da kxmrlz kcng tqalebo badr, nzayzlumlr mz da kxtrka. Nzpxtxpx-ngrdr ninge murde vz-nqblqx nzmncngr kxtubq.

²¹ Yawe, bzkq amnctxnq ninge esz'-krnge, X bzkq mnc-zvzme rlru.

²² Kxetu, vz-anim mz nzokatr-krm ninge, Murde nim Mevalu rnge.