Sam 35 - Natqgu

Sam Kranzpnu-tq-nrade-nzlvqn (35) Yawe, Amyatibz Drtq Krkcng Nanibqlr Ninge Enqmi Rngeng

Nabz ne Devet.

¹ Yawe, tu-ngalelvz ninge, murde enqmi rngeng nztu-ngalelvz-kzlr ninge, X vecamu badr krkcng tqveckr badr.

^2-3 Yrlqbz temz ngr lomrm kc tqyrputrngr nipna, X twzm popz' x nipna scmqng, Mz nzarlapx-krm ninge mz ncblo kcng tzmaneutilr ninge. X apqtrp drtwrnge kx tume mz nibrnge.

⁴ Aovxiong x amyatibz drtq leplz kcng tzrpilr nanibqlr ninge. X krkcng tzrpilr na-atrkatilr ninge, nabzdr nzmu natalvzo x nadwaszlr nim.

⁵ Atwzlr-ngrm enjrl nem mz nzmaneuti-krde nidr. Na-apusr-ngrde nidr leu kxglr kxyrklz kcng tqvxu-pulrtine nenq.

⁶ Navoneng mz lrpzki kx miglq x tu r nzlo, Murde nataong mz nzdwasz-krdr enjrl lc.

⁷ Kxmule-esz' trpnzngr da kxtrka kx alebo badr, A' se tzatu-kapqng br scdr x tzekqng gq mz nzlolvz-krdr ninge.

⁸ Mz drtwrnge mrlz nzpwrkilvc-krdr nzodatingr nidr, Mz nztao-mou-krdr mz br x trtxki kcng tzyrlqlr.

Nzayzlu-ngrmlr Nivz Lrnge Mz Da Kxtrka

⁹ Gct, mzli lcde sa na-abrtzlvzx nim, X drtwrnge elalzm mz nzarlapx-krm ninge.

¹⁰ X mz nabznge atwrnrngr, sa narpix kx, “Trpnzngr kx apule nim. Murde arlapxq kxtrnzxplrung mz mq kxnzxplrng, X kxtrpnzngr scdr zmatq mz kxnzrngiscng zmatq.”

¹¹ A' kxdrka'-ngrng nzabetitrlr ninge mz da kx tralewxu. Nzrpilr kx ninge kc tqrwzngr dalr nzkxpungr.

¹² Alebo badr da kxmrlz, a' nzayzlu-ngrmlr mz da kxtrka, Kx talvzongr nabznge.

^13-14 Mz nzyagox-krdr, vzti drtwrngeng. X axtx-zvzx dakxnzng, X biox narnge mz nzkrka'-krnge nidr, Da kc tqwaisr-ngrne mzlengeng x kztengeng. Murde yc-zlwzngr drtwrnge nidr, Apule kx vzngr drtwrnge x yrnitix lxenge mzli kc tqbz-ngrde.

¹⁵ A' mzli kx mnc-ngrne mz nzkxpungr, Nzyrlwr-lxblrng mz nzyrpalelvz-krdr ninge. Leplz kxtrkrlzwxung delcng tzatrkati-zvzlr ninge.

¹⁶ Nzxtrnga-ngrdr ninge mz da kx prtilzleng ninge, X nzmadqtimlr nqngidr bange.

Arlapx Ninge!

¹⁷ ?Yawe, nzatrkatingr ninge lc, nakrlzbzle mzli kznike? Arlapx ninge mz leplz lcng tzapulr laion kx nangqdr ninge.

¹⁸ X sa na-awibo bam mz mz leplz nemqng Mzli kc nayrlwrngr mz nzangio-krgr nim.

¹⁹ Leplz lcng nzpxtxpx-krdr ninge trpnzngr noude. Bzkq rlr-ngrbzme badr nzabrtzlvz-krdr nzkxpu-krngeng, X nzyrpalelvz-krdr nzvzkr drtwrnge.

²⁰ Trnzkrlzlru nzycmnengr mz nrwx. A' nzpikiti-zvzlr krkcng tzmnc-lrping mz ma nyzdr.

²¹ X nzpibqti-kzlr ninge mz nzrpi-krdr kx, “Eke! A' mcpekr da kxtrka kc tqaleq.”

Ayrplapx Nidr!

²² Yawe, krlzq nikeng nzalemlr bange. Bzkq mnc-lrpiq x obqlvztx-ngrn nidr.

²³ A' vzm, tum mz nibrnge, X ota-ngrbz ninge.

²⁴ Bzkq rlr-ngrbzme badr nzbilvz-krdr ninge. A' pim bange trnzvz-rbr-krpwc'u murde tubqq mz nzryrlq-krm drtwr.

²⁵ Bzkq rlr-ngrbzme nzrpi-krdr kx sc tzaovxiopelr ninge, X me pnz drtwrdr ngidape.

²⁶ Amyatibz drtqdr krkcng tzabrtzlvzlr nzetqkr drtqnge. Krkcng tzobqszolr ninge drtqdr nzmu namya-zlwzng mz mz leplz x namanepeng.

²⁷ A' kztengeng kcng tzsuti drtwrdr kx natubqbo mz nzobq-krm, batrpz badr nzmalqlvz-krdr nim, Mz nzrpi-zvz-krdr kx, “Yawe, myalz-esz'-ngrn! X abrtzlvzq nzmnc-zpwxkr kxnzawz nem.”

²⁸ X mz zbq lc sa naglqlz-zvzx nim, Mz nzangrlvz-krnge nztubq-zlwz-krm.