Sam 34 - Natqgu

Sam Kranzpnu-tq-nrade-pwx (34) Kxrka X Kxokatr Kzdq Nabz Ngr A, B, C

mzli kc narpi-ngrbz nalukurnr-ngrde mz mz Abimilek, kc tqmapulr-ngrde nide x sc tqvzpe.

¹ Awi-zvzbo mz Yawe, X tramawxu nzglqpx-krnge nide.

² Bilvz-zvzx Yawe mz nabznge, Murde nimu kx nzaetqbz drtqmu na-abrtzlvzamu da kcng tqaleleng.

³ Clve Yawe doa x da amrlx. Naglqlzku drtqde. X napipx-lxblr-ngrgu nzetu-krde.

⁴ Da kcng tqmwxlrtix, arlapxpebz Yawe ninge mz da lcng amrlx. Murde mzli kc tqkrka'-ngrbo bade, ayzlumle natqnge.

⁵ Elr! Na-abrtrpzmu drtwrmu mz Yawe, murde ma drtqmu tqmya, X na-abrtzlvzamu nzokatr-krde nimu.

⁶ Gct, mzli kc nzmnc-krnge tqtrka-ngrde, arlapxq ninge, Mz nzatutr-krm nzkrka'-krnge.

⁷ Ili! Enjrl ne Yawe arlapxle leplz mzli kc drtqdr tqetq-ngrde, Murde aclvele krkcng tzmyatitrlr Yawe.

⁸ Jzsamu ena nzmrlzkr Yawe x na-abrtr-krbzmu drtwrmu bade. Murde krkcng tqaclveleng nzabrtz-zvzng.

⁹ Kxnzvz-nqblqlr natq Yawe nzrngiscng da amrlx. Delc nimu leplz nedeng na-amrlue-ngrnamu nide.

¹⁰ Laion kx nzxplrng nzkrlzlr nzbrtalengr, Leplz kx nzvz-nqblqlr Yawe, trpnzngr da kx mrbrpxm badr.

¹¹ Mrlxngeng x inyxngeng, lalztqmamu bange, Murde na-alvztrpo bamu kxnamu nzamrluengr Yawe.

¹² ?Nike suti drtwrm? ?Nzlungr kxmrlz kxboi?

¹³ Obq zpwx, x bzkq pokiaq. Bzkq ycmne-atrkatiq leplz,

¹⁴ Prszpx nqmq kxtrka. X ale zvz da kxmrlz. X nasuti drtwrm nzmnc-zpwx-krmu badr leplz mz nrwx.

¹⁵ Rlxtibz ncblo kxtubq mz Yawe nzokatr-krde nide. X Yawe sa naxlrbzle nzkrka'-krde mz nzaclve-krde nide.

¹⁶ Sa napnanatile krkcng tzale-zvzng da kxtrka. Trobqpwzu badr x mzli kc nabz-ngrdr, ani txpwz nzmrbrtrkr mz drtwr nidr.

¹⁷ Takitrde nzxlr-krbz Yawe natq leplz kxnztubqng mzli kc tzyrni-ngrbzlr bade, Murde ngi nqmq krde nzokatr-krde leplz nedeng.

¹⁸ Vz zvz nzesolvzti-krde krkcng drtwrdr tqvz, X nzamnc-lrpi-krde krkcng nabzdr tqyrnibu.

¹⁹ Wzpxtx zlwz nzkxpukr ncblo kxtubq. A' Yawe sa na-arlapxle nide mz da lcng amrlx.

²⁰ X mz nzaclve-zpwx-krde nide, Trpnzngr nrvr ngrdeng kx nztavxi.

²¹ Yawe sa na-ayrplapxle kxdrka'-ngrng kcng tztrkalr-ngrdr kxnztubqng. X nqmq krdr lc tqtrka sa nanibq-moule nidr.

²² Zvz Yawe nztu-krbzle mz nibr kxnzawz nedeng. X trpnzngr nzayrplapx-krde krkcng tzabrtrpzlr drtwrdr bade.