Sam 33 - Natqgu

Sam Kranzpnu-tq-nrade-tq (33) Angrlvzku Yawe Mz Nabz Kxyrlvi Nabz Kxmrna

Nabz ne Devet.

¹ Naelalvzku Yawe, nigu kx nztubqng. Murde mrlzvxi nzglqpx-krgu nide.

² Na-angrlvzku nide mz nabz kx yrlvi mz nzawingr, X mz nzayrni-krgu gita x ukzlele.

³ Nangr-ngrbzku bade nabz kxmrna, Mz nzmalqlvz-krgu nide.

⁴ Murde natqdeng amrlx tubq-esz'ngr, X da amrlx kcng tqaletileng takitrde nzbrtikr drtwrgu.

⁵ Mrlz bade da kx mrlz x tubq. X mz nrlc tulvzo nzaodukr Yawe tqvzpe tqvzpe.

Kxrpalz

⁶ Yawe wz-ngrde bongavz mz natq kx kapxle, X nepi, temz, x vri amrlx mz nzycmne-krde.

⁷ Ata-lxblrtrle dcpwe me esz', X yrlqbzle bz ngr prla amrlx.

⁸ Nigu leplz amrlx mz nrlc, ncblo, olvz, x doa kxnztopwzng, Na-amrlueku x na-amatqku Yawe, Kxrpalz.

⁹ Murde wz-ngrde nrlc mz nzycmne-krde, X mz nzrkapx-krde natq dekc tqycngr.

¹⁰ Yawe atrkatile drtwr kx nzyrlq leplz, X ngi-batrpzle trnzngidati-kru mrkc tqpnz drtwrdr.

¹¹ A' drtwr kx yrlqleng ngidati zvz, X nqmq nr nabzde tqvzpe tqvzpe.

¹² Sa namrlzbz mz lr drtqbr kcng tzangiolr Yawe murde nide Gct rdr. Murde leplz kcng tqmcpxle kx nangi nedeng nzabrtz-zvzng.

Lr Nrlc

^13-14 Yawe obqom mrkc tqwxbuo-ngrmle mz tron nyzde Heven, Mz nzmco-krmle leplz amrlx mz nrlc ka.

¹⁵ Ngi batrpzle nzao-krdr drtwrdr, X krlzle da amrlx kcng tzalelrng.

^16-17 King traovxiou mz nzxplrkr ami nede. X ncblo ngr vea tr-rlapx-kzu mz nzxplr-krde x hcsi nede.

Kxarlapx Kxokatr

¹⁸ A' Yawe kc tqaclvele krkcng tzamatqlr nide, X nzbrti drtwrdr nzaodu-zvz-krde nidr.

¹⁹ Arlapxle nidr mz nzbzngr, X axplrle nidr mz mzli r dzbi.

²⁰ Mnc-xgleku Yawe nzokatr-krde nigu. Murde nide temz ngr lomrgu kc tqyrputrngr nipna.

²¹ Abrtzlvzku nide, X drtwrgu abrtrpzku mz drtqde kxtr.

²² Krka'ku kx Yawe na-aodu-zvzle nigu Mz nzbrtikr drtwrgu nide.