Sam 31 - Natqgu

Sam Kranzpnu-tq-nrade-esz' (31) Nzbrkr Drtwr X Nztalvzokr Nabz Nzbrkr Drtwr

Nabz ne Devet kx yrbzle mz kxrmailz ngr dzbe kxnzngrng.

¹ Yawe, nim me rlakitrx. Bzkq rlrpx-ngrn nzaovxiokr enqmi rngeng ninge. A' arlapx ninge, murde ale-zvzq da kxtubq.

² Ayzlu-anim nzyrni-krnge mz nzarlapx-krm ninge. Nanginim butqbr kx namnc-kapqpx-ngrmc.

Nztalvzokr Nabz

³ Mz nzngini-krm lrpalvc ngr nzrlapxngr, Aclve x mailz ninge mz nzvz-nqblq-krde natqm.

⁴ Bzkq rlr-ngrme nzprtz-krnge mz trtxki kc tzamwi-kapq enqmi rngeng, Murde nim me rlakitrx.

Nzbrkr Drtwr

⁵ Yawe, aprcbo mqngrnge mz mqm. Murde nim Gct kc tqbrti drtwr mz nzxpepx-krm ninge.

⁶ Kxetu, abrtxtrpo drtwrnge bam, A' pxtxpx-ngrne krkcng tzangiolr mqngr da txneng kx nzlz.

⁷ Drtwrnge sa naelalzm x na-abrtzlvzx nzaodu-zvz-krm, Murde okatr-zvzq ninge mz mzlir nzetqkr drtqnge x nzkxpu-krngeng.

⁸ X tr-rlr-ngrpwzmeu ninge mz mq enqmi rngeng, A' amnc-nrwx-ngrbzme nabznge mz nzvzne-krnge.

Nztalvzokr Nabz

⁹ Yawe, nayc mz drtwrm ninge murde nabznge talvzo. Mzke' vaotxpe-ngrde nzyrni-zlwz-krnge x nrkrdrtqnge mewetxpengr.

¹⁰ Yangrngapex mz nzvzkr drtwrnge x drtqnge satxpe murde bztipenge nzyrningr. Drtqnge yayrpe-ngrde nzmnc-rbr-krnge x nipenge nrvr-nrbalq.

¹¹ Enqmi rngeng nznelvztilr ninge X kxnzmnc-aepztrpqng bange nzobqszopelr ninge. Kxkrlzti-lzbqkr badr nzapusr-ngrdr ninge da kxtrka X krkcng tzmclr ninge mz lrpzki nzdwa-ngrdr ninge.

¹² Leplz amrlx mrbrtinetrpe drtwrdr ninge, opxm kx bzpex. Apunepebo badr brmrda.

¹³ Mnc-zvzx mz zmwxlr mz nzxlr-krnge nzlc-awakr enqmi rngeng, Kcng tzyrlqlr drtwr kx nanibq-ngrdr ninge.

Nzbrkr Drtwr

¹⁴ A' Yawe, nim Gct rnge, X abrtrpo drtwrnge bam.

¹⁵ Arlapx ninge mz enqmi rngeng kcng tzayotilr ninge, Mz nzaclve-angidr-krm ninge.

¹⁶ Amrlz ninge, kxnzawz nem, Mz nzarlapx-krm ninge murde nzaodu-krm tqyc tqyc.

Nztalvzokr Nabz

¹⁷ Yawe, bzkq rlrpx-ngrn nzkqle-krnge nim nzamyati-ngrm drtqnge. A' amyatibz drtq kxdrka'-ngrng murde napwrkilvc-ngrdr nzbz-krdr.

¹⁸ X na-aesakile natq kxnzpokiang x kxnzglqpx-lzbqng, Kcng tzxtrnga-ngrdr kxnztubqng.

Nzbrkr Drtwr

¹⁹ Myatxpx zlwz da kxmrlzti kcng tqyrlqq nangi sc krkcng tzamrluelr nim. Murde aelwapxpe-ngrn kx aclve-zpwxq krkcng tzrlatrpzng bam.

²⁰ Leplz nemqng nzrlapxng mz drtwr kx nzyrlq enqmi rdrng x nznelvztingr nidr, Murde amnc-aepztrpzme nidr bam.

²¹ Yawe, glqpx-ngrne nim nzaodu-krm ninge. Murde mzli kc enqmi rngeng tztu-ngalelvz-ngrdr lrpalvc nyznge, mnc-zpwxx mz nzetukr nivz lrm.

²² Mwxlrx murde opxm kx maszlrpx-ngrn ninge. A' xlrme nzkqle-krnge nim kx naokatrq ninge.

²³ Nigu leplz neng Yawe naka-lzbqbzku bade. Murde aclvele kxnzvz-nqblq-zpwxlr nide, a' ayrplatipxle kxnzglqpx-lzbqng.

²⁴ Bzkq nabzgu tzprlzm, a' natu-amqngiku Mz nzbrtikr drtwrgu nide.