Sam 30 - Natqgu

Sam Kranzpnu-tq (30) Yawe Alrti-zvzle Nzyrnibungr Mz Nzelalz-krm Drtwr

Nabz ne Devet.

¹ Yawe, glqpxx nim mz nzarlapx-krm ninge mz mq enqmi rngeng. Murde tr-rlr-ngrpwzmeu badr nzaovxio-krdr ninge murde ma tzbilvzlr ninge.

² Yrnibo bam mz nzokatr-krm ninge, X amrlz-mowq nrkrdrtqnge.

³ Mzli kc tqycpe pipz nzbz-krnge, Arlapxq ninge x nrkrdrtqnge trnavzopeu mz gq.

⁴ Yawe, tr-esz'ngrn, x nigr leplz nemqng na-angrlvzkr nim, Mz nzawi-krbzkr bam da kx aletiqng.

⁵ Zngya ngr drtwrm trboiu, A' nzaodu-krm nigr tqyc tqyc. Kxmule-esz' yrnibutikr nrlckxbq, A' nzyrni-krgr sa nalrtipxle nzabrtz-krgr mz nzmc-krgr zyzlr mz nourla kxtopwz.

⁶ Yawe, mzli kc tqmnc-zpwx-ngrne, rpi-zvzx kx, “Trpengr doa x da kx namwxlrtix.”

⁷ Murde xngibo nzamrlz-krm ninge, mz nzapu-krm rtabu kx xplr kx tu-ngalelvzle ninge. A' mzli kc tqprtz-ngrm da kxtrka bange, opxm kx esablqtime ninge, sc tqmwxlr-zlwzpex.

⁸ Delc Yawe, tqkqle-ngrne nim. X rlxtibo nzyzluti-krme ninge.

⁹ Rpibo bam kx, “Bzkq rlrpx-ngrn nzvzo-krnge mz gq, Murde trpnzngr da kx mrlz kx naprpxm mz nzbz-krnge. X rblxpe nzyapwxtipx-krbo mz leplz mz nzangidati-krm, Nzmu namibilzpemc mz drtc'.

¹⁰ Yawe, xlrm natqnge mz nzyckr drtwrm ninge. Kxetu rnge, okatrp ninge.”

¹¹ Alrtibzme nzyrnibu-krnge mz nzelalz-krm drtwrnge, Mz nztekqtr-krbzme nzvzkr drtwrnge mz nzabrtz-krnge.

¹² X rblxm bange nzmnc-lrpi-krnge. A' navz zvz nzangrlvz-krnge nim. Awi kxetu, Yawe!