Sam 29 - Natqgu

Sam Kranzpnu-li-nrade-rpwxmz (29) Natq Yawe Mz Trlipu

Nabz ne Devet.

¹ Nimu enjrl ngr Heven nayrngzobzmu mz Yawe, Mz nzmc-krmu nzmyalz-krde x zmatq ngrde.

² Napipxamu kx takitrde nzamrluengr drtqde, Mz nzangio-krmu nztr-esz'ngr-krde.

³ Murde natq Yawe aelwapx-lzbqngr mz trlipu. Nate kxmatq o-zlile dcpwe mz nzapu-krde bzlrmei prla.

⁴ Natq Yawe matq-esz'ngr. Eu. Natqde xplr zlwz.

⁵ Natq Yawe rpesaliti nc trpili, Mz nzapu-krdr nounc kx nzlapizting.

⁶ Natq Yawe aycngrlrle newz nyzgung, Mz nzapu-krdr ncblo kx nzelang.

^7-8 Natq Yawe batrpzle bzlrpc. X bzlrmei ngrde aycngrlrle peto.

⁹ Natq Yawe apule nenq kc tqrkqtuti nc yrni x krlxpqtile leu rdr. X kxnzangiong amrlx mz Mangr-nzangiongr nzrpilr kx, “Gct, nzmyalz-esz'ngr-krm glqlz-ngrgr nim!”

¹⁰ Nubla ngr tewa kxetu yclzbz mz zmatq ngr Yawe, Mz nzngini-krde King kc tqaclve alo.

¹¹ X mz zmatq lc axplrle nigu leplz nedeng Murde namnc-zpwxku.