Sam 24 - Natqgu

Sam Kranzpnu-li-nrade-pwx (24) King Kc Tqmatq Vztr Mangr-nzangiongr Mz Mzteadau Nyzde Neke Takitrde Nzprtr-krde Mangr-nzangiongr

Nabz ne Devet.

¹ Nrlc atwrnrngr nyz Yawe, X doa amrlx mz nrlc nedeng x da amrlx mz nrlc scdeng.

² Murde nide Kxrpalz kc tqwz-ngrde nrlc, X yrlqbzle prla x drtc' mz zmatq ngrde.

³ ?Mz nzaotikr drtwrgu zmatq lc, neke tubqbz bade nzvzdzbz mz newz nyz Yawe? ?X neke takitrde nzprtr-krde Mangr-nzangiongr nide?

⁴ Leplz kx nabzdr lq x nzmnc-krdr tubq Nztakitrdr nzodutr-lxblr-krbzlr mz Yawe. Natqdr nzangidati-zvzlr. X trnzangiolru mqngr da kx nzlz.

⁵ Leplz kxnzmulr lcng nztubqbzng mz nzobqkr Yawe. X Gct r Jekop lc sa na-amrlzle x na-arlapxle nidr.

⁶ Leplz lcng nzrtangrtilr me pnz drtwrde, X suti drtwrdr nzxngi-krbzlr nzulrde mz Mangr-nzangiongr nide.

King Kc Tqmatq

⁷ Lvxpxbzmu bade naonrx ngr Jerusalem, X naonrx ngr Mangr-nzangiongr kcng tqblzlongr, Murde King kc Tqmatq navztrp.

⁸ ?King kznilc tqmatq? Krlc Yawe, kc tqrninr, tqxplr. Krkc tqaovxio zvz mz vea.

⁹ Lvxpxbzmu bade naonrx amrlx, X naonrx kcng tqblzlongr, Murde King kc Tqmatq navztrp.

¹⁰ ?King kznilc tqmatq? Krlc Yawe, Ngrlrvea ngr ami nedeng. Nide King kc Tqmatq.