Sam 22 - Natqgu

Sam Kranzpnu-li-nrade-li (22) Nzrlxtingr X Nzrlxngitingr Nzrlxtingr

Nabz ne Devet kx yrbzle mz kxrmailz ngr dzbe kxnzngrng.

¹ Gct! Gct o! ?Memule tqvzszpe-ngrn ninge? ?X memule tqpxtxpx-ngrn nzokatr-krm ninge x trlalztqpepqu mz nzkrka'-krnge?

² Yrniti-zvzbo bam ngrlx x nrlckxbq, A' trmnc-zpwxwxu murde trayzlumeu natqnge.

Nzrlxngitingr

³ Nim King rgr kxtr-esz'ngr kc tqaclvele nigr lr Israel. X angio-zvzkr nim.

⁴ Melrmqgrng nzabrtrpzlr drtwrdr bam. Nzlxngitilr nim x arlapxq nidr.

⁵ Nzmnc-xglelr nim x tu-zvzbzme mz nibrdr. Nzrlxtibzlr nzokatr-krm nidr x angidatibzme natqdr.

Nzrlxtingr

⁶ A' nzapusrngr ninge brmrda. Nzngangr-ngrdr ninge mz nzobqszo-krdr ninge.

⁷ Nzycngrlrmlr nardr bange x nzmabqtimlr benaodr bange. X nzxtrnga-ngrdr ninge.

⁸ Nzrpimlr kx, “Abrtrpzme drtwrm mz Yawe, a' namckr ena nzarlapxkr Gct nim mzli ka. Murde trokatrleu nim, kxmule-esz' rpiq kx mrlzti-zlwzle nim.”

Nzrlxngitingr

^9-10 Yawe, yzuo mz zbq kc tzmcngr mzke', krlzmle mzli ka, Abrtr-zvzbo drtwrnge bam mz nzngini-krm Gct rnge. Murde aclve-angidrq ninge mz nzrmcngr mzke', X mz nzyq-krnge neyr lxenge.

¹¹ Bzkq rlaszq ninge, murde trpnz-moungr kx naokatrle ninge, Mz nzesotrpe-krm enqmi rngeng bange.

Nzrlxtingr

¹² Yawe, enqmi lcng tztu-ngalelvzlr ninge. X nzrpilr nanibqlr ninge mz nzapu-krdr poi kz peto.

¹³ Naodr mznem mz nzvz-krmlr bange, Mz nzmakx-krdr ninge mz nqngidr kxmalc.

¹⁴ Nzxplr-krnge yrkrpxpe apule lue kc tzpulio mz drtc' kx mingr. Mrkcng tzaxvctrngr nrvr rngeng nzbxplctipeng, x nqmq nr nabznge baonepe.

¹⁵ Mzli trnaboipeu nzbatr-krme nzbz-krnge. Murde mewe-zvzpex x drtwrnge brlxkz apule nabr kxngibr mz nepi.

¹⁶ Kxdrka'-ngrng nztu-ngalelvzlr ninge, nzapulr kuli kx namaneutilr ninge, X sc tzmaplxtitrpebzlr mqngeng x nanycngeng.

¹⁷ Mcx kx ninge nrvr-nrbalqtxpe. X nzobqszneopelr x nzyrpalelvzpelr ninge.

¹⁸ Nzakiti-lzbq-ngrdr nctq lrpz scnge, X nzkq scnge kc boi nzayrleo-ngrdr daes, mz nzkrlz-krdr doa kx narngisc.

¹⁹ Yawe, bzkq mncme rlru. A' vz-anim mz nzokatr-krm ninge.

²⁰ X arlapxbz nzlu-krnge mz mq ncblo kxayo lcng, Tzmaneutilr ninge mz nzapu-krdr kuli kz peto.

²¹ X mnc-ngalelvz ninge, murde ma tzluplxtilr ninge mz toki r vea scdr Tzapulr nqngi poi kz peto.

Nzrlxngitingr

²² Mz nzyrlwr-lxblrkr leplz nemqng, Sa nabilvzx nim, mz nzrpi-krbo mz mzlengeng da kx aleme bange.

²³ Murde sa napipxbo badr kx, “Nigu kxnzawz neng Yawe, naglqlzku nide! Eu. Nigu lr Israel na-amrlueku nide mz nzamatq-zvz-krgu nide!

²⁴ Kxmule-esz' nigu kxnzobqszong, a' Gct trobqszoleu nzkxpu-krgung, Murde trpxtxpx-ngrdeu nzayzlu-krmle natqgung.”

²⁵ Delc Yawe, narka-ngrbo blz ngr nzawingr kc tqpibo, mz nzyrlwr-lxblrkr leplz nemqng. Murde nim nou nzrglqlz-krnge.

²⁶ X mz nibrde, sa nakrlcng mz dakxnzng kx vzpxm mz blz kc tqkabo bam. X sa naglqlzlr nim mz nzbrtikr drtwrdr nim. Amrlz-zvzbz nidr mz nzmnc-zpwx-krdr.

²⁷ Yawe, lr mrkzbleng amrlx sa na-aoti drtwrdr nim mz nzplzpx-krbzlr alwx ngrdr bam. X neidu lcng amrlx sa na-angiolr nim,

²⁸ Mz nzngini-krm King kx matq-esz'ngr Kc tqaclve-zvzle nidr.

²⁹ Delc kxnzetung badr leplz nedrng sa nayrngzobzng bam, Mz nzavzo-lzbq-krbzlr bam.

³⁰ X doa negrng kz sa nawztrpzng bam, Mzli kc naxlrtr-ngrmlr bagr nrpa ngrm,

³¹ Mz nzrpi-krbzkr badr kx, “Yawe arlapx-zvzle leplz nedeng.”