Sam 21 - Natqgu

Sam Kranzpnu-li-nrade-esz' (21) Nzglqlz-ngrbz Nzaovxiokr Yawe King Devet Glqlzle Gct

Nabz ne Devet.

¹ Yawe, ninge king nem x abrtz-zlwzx murde nzrka-krme bange zmatq. Bilvzx nzaovxio-krbzme enqmi rngeng.

² Da amrlx kcng tqsuti drtwrnge, tqrlxtibo. X sc tqkatimeng x alebzmeng amrlx.

³ Vzpeme bange mz nzrka-krme da kxmrlzting. X alaome mz narnge kraon kx ngi gol.

⁴ Rlxtibo nzlungr bam, X kapeme bange nzlungr lc tqboi.

⁵ Leplz kxkqlu nzxlrlr nrpa ngr drtqnge, murde okatr-zvzq ninge. X nzamatqlr ninge, murde armyalzq ninge mz nzngini-krnge King.

⁶ Da kxmrlz kcng tqkatimeng bange, sa nayc-alomqng bange. X abrtz-zvz-ngrne nzmnc-krme bange.

⁷ Yawe kc tqrninr, ninge king nem x abrtrpo drtwrnge bam, Murde namnc-zpwxx mz nzaodu-krm kc tqyc tqyc.

Leplz Nzglqlzlr Gct

⁸ Yawe, aovxio-zvzq enqmi rmqng, X lolvztiq krkcng amrlx tzpxtxpx-ngrdr nim.

⁹ X mz nzlolvzti-krm lc nidr, odatiq nidr, apule nyr kc tqangcle nrlc. Yawe, milxtxo-zvzq nidr x ayrkrtxtrq nidr mz nyr.

¹⁰ Trpnzngr kx rlapx mz nqvi lrdr, Murde nibqtiqng amrlx.

¹¹ Mz nzyrlq-krdr drtwr ngr nzota-krmu badr mz vea, Trna-angidalru drtwr lc tzyrlqlr.

¹² Murde nzdwaszlr nim Mz nzpnz-krm nidr mz nipna scmqng.

Leplz Amrlx

¹³ Yawe, glqlz-ngrgr nim nzxplr-esz'ngr-krm. X angrlvzkr nim mz zmatq ngrm.