Sam 2 - Natqgu

Sam Krali (2) Kxnzmcpx Ne Gct Kxnzngqngung

¹ Lr mrkzbleng nzngqngung mz nzngyatikr drtwrdr Yawe. Murde mane nzyrlqtingr drtwr mz nzatrkatingr nide.

² King rdrng x kxnzrmailz rdrng nzyrlwr-lxblrng Mz nzoliqti-krdr nzota-krdr badr Yawe x Kxnzmcpx nede.

³ Nzrpilr kx, “Na-axtxbzku nzmnclz-krbzku mz zmatq ngrdr, Mz nznikitx-krgu nqvi kc tzpe-ngrdr nigu, murde drtqgu naopx.”

⁴ A' King Yawe kc tqmncom Heven yrpalelvzle nidr, X xtrnga-ngrde drtwr kcng tzyrlqlr.

⁵ Ycmne-zngyabz badr, X nzmwxlr-ngrdr natqde kxpq.

Natq Yawe

⁶ Murde rpile kx, “Yrlqpex King kc tqmcpxpex Jerusalem Mrkc Saeon, newz kxtr nyznge.”

⁷ X King kc tqmcpx Gct, rpile kx, “Napibo nike pim Yawe bange. Rpimle kx, ‘Nim Mrlxnge, abzo mzbq ka, sa na-aelwapx-ngrbo mz leplz nzngini-krnge Trtem.

⁸ Rlxtim bange x sa nakabo bam zmatq ngr nzaclvengr neidung amrlx, Murde leplz mz nrlc tulvzo nangi nemqng.

⁹ Sa na-aovxioq mrnyzdr mz nzxplr-zlwz-krm, Kc na-apule bz kc tqrniglc botol.’” Natq kx pibz Yawe mz Mevalu nede delcng.

Kxnzyrplapxng

¹⁰ Delc nimu king x kxnzrmailzng mz nrlc nayrplapxamu, X nalalztq-angidramu, mzli ka tqycbe-ngrbz mzli.

¹¹ Narnrctrpzmu mz nzamrlue-krmu Yawe, X mz nzwztr-krbzmu bade.

¹² Yrngzobzmu mz Mrlxde, Murde ma tqodatile nimu, Mz zngya ngr drtwrde kc tqwou. A' nimu amrlx kcng tzrlatrpzng bade, sa namnc-zpwxamu.