Sam 18 - Natqgu

Sam Kranzpnu-esz'-nrade-rtqmz (18) Yawe Nide Temz Ngr Lomr Kc Tqyrputrngr Nipna Nqmq Kr Yawe

mzli kc Yawe tqarlapx-ngrbzle nide mz zmatq ngr enqmi rdeng x King Sol.

¹ Yawe, mrlztix nim Murde axplrq ninge.

² Nim Gct rnge, x butqbr kx rlakitrx. Nim lrpalvc nyznge peto, X Mevalu rnge kx arlapxle ninge. Nim nou zmatq rnge apule temz ngr lomrnge kc tqyrputrngr nipna.

³ Kqle-zvzx nim kc tqtakitrde nzrglqlzngr, X vzme arlapxq ninge mz mq enqmi rngeng.

Nzkrka'-krnge

^4-6 Yawe, mzli ka tqkxpu-ngrne kqlex nim mz nzokatr-krm ninge. Murde ycpe pipz nzbz-krnge. Opxm kx zmatq ngr nzbzngr sa na-aovxiole ninge, Mz nzpe-amqngi-krde ninge. A' krlzx kx sa naxlrme ninge mz Mangr-nzangiongr nim, Mz nzayzlu-krme natqnge.

Zmatq Ngr Yawe

⁷ Mzli kc Yawe nakaputr-ngrmle, zmatq ngrde myalz apule nengq. Nrlc ycngrlr-atwrnrngr x wai-kzle nou newzng. Murde Gct ngyati zlwz drtwrde enqmi rngeng.

⁸ X natqde apu-kzle trmami kc tqyrpupx. X ncte vzpx-ngrm zsikapu. X naode rlxpx-ngrm nyr x rplz kxpq.

⁹ Lvxpxle bongavz, X vzom tuom mz dcbz kx botapz'.

¹⁰ X kzdq enjrl lvcmio-animle nide. Mz nzrtwz-krdr nenq.

¹¹ Nzlo ngr zbo ngr tewa Apule lrpz kx mnc-kapqpx-ngrmle.

¹² X aelwapx-ngrde zmatq ngrde mz zyzlr kxluli. Mz nabz zbo lc bzlrpc tqpctipx x muli-aes tqrlxtiom vzmi rplz kxngc.

¹³ Yawe myatxlz-esz'ngr, ngi-batrpzle nzyrpupxkr bzlrmei. X natqde nzxlr mz nrlc tulvzo.

¹⁴ Rpna-ngrbzle nipna x aodalitile enqmi rngeng. Vz-nqblqbz bzlrpc x nzvo-alo-ngrdr.

¹⁵ Mzli kc Yawe tqpnanati-ngrde enqmi rngeng, Natqde apzlzmle me boo-ngrng, X atu-lxlr-ngrde nou nrlc.

Nzarlapxkr Yawe Ninge

¹⁶ Yawe rtrngztiomle ninge mz nzokatr-krde ninge Apule kx veclzmle ninge me boongr prla.

¹⁷ Kxmule-esz' yangrngatrpo mz nzxplrkr enqmi rngeng, A' sc tqvz zvz nzarlapx-krde ninge.

¹⁸ Nzvzmqng mz nzota-krgr badr mzli kc tqprtilz-ngrde ninge nzkxpu-ngrng. A' Yawe sc tqtum mz nibrnge.

¹⁹ Mailzle ninge me nzmnc-zpwx-ngrne, X arlapxle ninge, murde abrtzlvzle ninge.

Nzvz-nqblq-krnge Yawe

²⁰ Yawe rka-zvzm bange da kxmrlzting mz nzvz-nqblq-krde nztubq-krnge. X ayzlu-ngrmle da bange murde nabznge lqngi.

²¹ Vz-nqblq-zvzx nqmq kr Gct rnge, X tresablqtiwxu nide.

²² Yrlq-angidrx Lou kxtr scdeng, X aoti zvz drtwrnge natqdeng.

²³ Trvz-rbrwxu mz nzmnc-krnge, A' yrlqpx-lzbqnge mz nzalengr alwx.

²⁴ Yawe ayzlu-ngrmle da bange mz nztubq-krnge, Murde nabznge lqngi mz nzobq-krde.

Yawe Badr Leplz

²⁵ Yawe, yrlq-zvzbz natqm mz krkcng tzyrlqbzlr natqdr bam. X amrlzq krkcng nqmq krdr tqmrlz.

²⁶ Tubqbzme mz krkcng nabzdr tqtubq. A' lolvzq mz br scm krkcng tzesabrng.

²⁷ Avzdzq krkcng tzavzo-lzbqng. X avzoq krkcng tzglqlz-lzbqng.

²⁸ Yawe, nim nou nzlu-krnge, mz nzapu-krm kxrtekatr lam pnrnge. X ayrkrpxq da kxtrka amrlx mz nzmnc-krnge, mz nzapu-krm zyzlr x nyr kxpq.

²⁹ Gct, rka-zvzme bange zmatq ngr nzota-krgr badr enqmi rngeng. X axplr-zvzq ninge mz nzdwa-ngaletr-krbo nabxbz ngr lrpalvc nyzdr.

Nzmyapxkr Yawe

³⁰ Nqmq kr Yawe tubq-esz'ngr, x natqde ngi da angidr zvz. X nginibzle lrpalvc nyzdr krkcng tzrlatrpzng bade.

³¹ Yawe nide txpwz Gct angidr, X butqbr nyzgu.

Kxokatr

³² Nide Gct kc tqaxplr-zvzle ninge, X tzbzle lrpzki rnge kxtubq kx nao-zlix.

³³ Axplr-zvzbzle nanycnge Mz nzvzne-krnge mz nartrkla ngr newz.

³⁴ Alvztrple bange nzrpnangr, Murde nakrlzx nzrvecngr nalr popz'.

³⁵ Yawe, apume bange temz ngr lomrnge kc tqyrputrngr nipna. X zmatq ngrm ngi popz' ngr nibrnge. Vzome murde namyalzx.

³⁶ Okatr-zvzq ninge, x rblx enqmi rngeng nzlolvz-krdr ninge. X trnzta-pulro-ngrdru ninge mz drtc'.

Kxaovxio

³⁷ Maneux enqmi rngeng, Vz vz x lolvz-zpwxxng mz nzodati-krnge nidr.

³⁸ Tzx nidr, vz vz x nztaong amrlx mz drtc'. X trpnzngr kx tulzm.

³⁹ Axplrq ninge mz nzotangr. Delc tqaovxio-ngrne enqmi rngeng.

⁴⁰ Nim kx rngi-batrp nzdwaszkr enqmi rngeng ninge, Murde naodatix krkcng tzpxtxpx-ngrdr ninge.

⁴¹ Nzbztidr nzyrningr kx naokatrng. Nzkqlelr Yawe. A' trpnzngr kx arlapxle nidr.

⁴² Wibrtix nidr, vz vz nzapulr bq kc tqtwz nenq. X rnzbrtix nidr, vz vz nzapulr dxlrbi ngr lrpzki.

King Kxmcpx Yawe

⁴³ Arlapxbzme ninge mz mq leplz kx nzmwati drtwrdr ninge. X yrlqq ninge mz nzaclve-krnge drtc' nyzdrng, Murde lr mrkzbleng namnclzmqng mz zmatq rnge.

⁴⁴ Nzyrngzomqng bange X nzvz-nqblqlr natqnge.

⁴⁵ Nzrnrctitr-lzbqmqng bange. Nzprpxmqng mz lrpalvc nyzdr. X nzmetxmqng bange.

⁴⁶ Yawe, nim Gct kx lu. Glqpxx nim murde nim butqbr nyznge. Glqlz-zvz-ngrne nim murde arlapx-zvzq ninge.

⁴⁷ Ayrplapx-zvzq enqmi rngeng. X okatrq ninge nzaovxio-krnge lr mrkzbleng,

⁴⁸ Mz nzarlapx-krm ninge mz mqdr. Yawe, ngi-batrpe' nzaovxio-krnge enqmi rngeng. X tu-zvzme mz nibrnge mzli kc ncblo nzrpilr naota-ngrgr badr.

⁴⁹ Gct, sa naglqlzx nim mz mzlir lr drtqbrng amrlx, Mz nzangrlvz-krnge nim.

⁵⁰ Yawe, ninge Devet, king nem, x okatr-zvzq ninge mz nzaovxio-krngeng. Aodu-zvzq ninge kc tqmcpxq x leplz ngr nqvi lrnge, tqyc, tqyc.