Sam 17 - Natqgu

Sam Kranzpnu-esz'-nrade-rlimz (17) Sa Namcx Mzpq Trvz-rbrwxu

Nabz ne Devet.

¹ Yawe, lalztqm mz nzrlxti-krbo nztubqngr. Xlrm natqnge murde nzkrka'-krbo bam trvzpxpuu mz naonge, a' vzdz-zpwxm mz nabznge.

² Mzli kc napipx-ngrn neke vz-rbr, mnc mz nrlarde nyznge, Murde nim kx rkrlz nike tubq.

³ X krlz-zvzq nzao-krnge drtwrnge X obqplxq nabznge mz nrlckxbq. A' trpnzngr da kx vz-rbr kx rmctiq. X pnzpe drtwrnge kx naonge trna-akawi-ngrwxu alwx.

⁴ Tralewxu da kx nzrtulrtrngr, da kc tzwai kzdung leplz. Murde vz-nqblq-zvzx natqm.

⁵ Trtaowxu mz nzatalzngr, Murde o-zli-zvzx lrpzki rm.

Nzkrka'ngr

⁶ Gct, krka'bo bam murde lalztq-zvzme bange. Kxetu, xlrm natqnge.

⁷ Delc na-aelwa-ngrme bange nzaodu-krm kc tqyc tqyc. Murde mzli kc tzrlatr-ngrbz leplz bam, arlapxbzme nidr mz mq enqmi rdrng.

⁸ Aclve angidr ninge na-apule dztum kx matq zlwz mz drtwrm. X amnc-kapqbz ninge da kc tqwai kio mz nzwxbulvzo-krde neideng.

⁹ Murde ma kxdrka'-ngrng tzlolvzlr x tznibqlr ninge, Mz nztu-ngalelvz-krdr ninge.

¹⁰ Trpnzngr nzrycngr mz drtwr kx ycbz badr. A' nzglqpx-lzbq-zvzng.

¹¹ Trpengr nrlarde kx navzkix, murde nzmnc-ngalelvzpelr ninge. X tzryrlqng drtwr kx nametxbo badr.

¹² Nzapulr laion kcng tzaenzli-kapqlr Mzli kx nadwa-ngrmlr mz nzpesaliti-krdr ninge.

Nzayrplapxngr

^13-14 Yawe, otaamu badr enqmi rngeng x aovxiong. Kapxm ninge mz mq kxdrka'ngr lcng mz zmatq ngrm. Arlapx ninge x ayrkrtxtr nidr. Murde nzabrtz-krdr yc txpwz mz nrlc ka. Ayrplapx leplz ngr nrlc mz zvetq kc tqoliqtipeq nakabzme badr, Navz navz nakrlzbzle doa nedrng x doa ne doa nedrng.

¹⁵ A' krlzx kx sa namcx mzpq mz nzvz-nqblq-krde nztubq-krnge. X mzli kc natulz-ngr-mopwc', sa na-abrtz-ngrne nzmnc-krbo bam.