Sam 16 - Natqgu

Sam Kranzpnu-esz'-nrade-esz'mz (16) Drtwr Ngr Nzmnc-zpwxngr Nzkrka'-krnge

Nabz ne Devet.

¹ Yawe, arlapx ninge, Murde nim kx abrkitrx drtwrnge.

² Nim Kxetu rnge X nou da kxmrlzting amrlx kcng tqngiscngeng.

³ Leplz nemqng kcng tztrng mrka mz nrlc, Nzmyalz-zlwzng x mrlz bange nzmnc-krgr badr.

⁴ Nzkxpukr krkcng tzangiolr kxtrngiu Gct angidr sa nartxlvzlz zvz. A' trna-angiowxu gct rdr kxnzmncng mzlilxlr, X trnakrka'pou badr. X trtxpnzngr nzpulio-krnge mepyr ngr blz mz olta nyzdr.

⁵ Yawe, apume bange drtc' kxmrlz nyznge x tzme bange lrpzki kx nao-zlix. X nzlu-krnge yctrpz bam.

⁶ X mrlzm bange me ngi bz ngr da kx katimeng x da kx trkatipwe'u bange. Murde mrlzm bange da amrlx kcng tqkatimeng mz nzngini-krme bange trtenge.

Nzglqlz-krnge Yawe

⁷ Yawe, naglqlz-zvzx nim mz nzmailz-krm ninge. Murde mz nrlckxbq aopxme nabznge mz nzaongr drtwr kxmrlz.

⁸ Dcpx zvz mz drtwrnge kx mnc-zvzme bange. X trpnzngr doa x da kx na-aycngrlrle ninge, murde tu-zvzme mz nibrnge.

⁹ Delc nabznge tqabrtz-zlwz-ngrde x drtwrnge tqelalz-ngrmle. X tqmnc-zpwxpe-ngrne.

¹⁰ Murde tr-rlrpx-ngrwq zmatq ngr nzbzngr nzaovxio-krde ninge, ncblo kxtr nem. X trayrbqtxwq nrkrdrtqnge mz gq mz nzmibi-krde.

¹¹ A' aelwa-zvz-ngrm bange drtwr ngr nzmnc-zpwxngr: Nzabrtz-zlwzngr kxmyalz vzpxm mz nzxngi-ngrbz nim. X da kxmrlzting nzvzpx-zvzmqng mz mqm.