Sam 147 - Natqgu

Sam Kratrtqki-esz'-nzpnu-pwx-nrade-rlimz (147) Yawe Amrlzle Nigu Leplz Nedeng Mz Zmatq Ngrde Yawe Rngisc Zmatq Kx Xplr

¹ Naglqlzku Yawe! Mrlzvxitx nzangrlvz-krgu Gct rgu. Brngzvxitx x takitrde nzglqlz-krgu nide.

² Yawe yrlq-zpwx-moule Jerusalem, Mz nzvzmi-kr-mople lr Israel kcng tzlolvzting enqmi rdrng.

³ Rka-mopwz nzabrtzngr mz leplz lcng drtwrdr tqtalvzo, Mz nzawxo-krbzle drtwrdr apule kx pnutibzle kxsqki rdr.

⁴ Krlzle me krlzbz nzkqlukr vri, X yrlqtibzle drtqdrng amrlx.

⁵ Yawe etu-esz'ngr x rngisc zmatq kx xplr. X trpnzngr kx rkrlzlzbz nzyrplapx-krde.

⁶ Atubxlzle kxnzobqszong, A' rnzbrtiole kxdrka'-ngrng mz drtc'.

Mnc-xgleku Zmatq Rde

⁷ Nangr-ngrgu nabz kx yrlvi mz nzayrni-krbzku gita mz Yawe, Mz nzawi-krbzku bade.

⁸ Murde yrlqtibzle dcbz mz bongavz x adco-ngrmle tewa nalrprngr drtc', Murde nalutingr nabr kxvo mz nra.

⁹ Rkabz dakxnzng mz animol amrlx, X aputrle nei utc amrlx mz nzyrni-krbzlr bade mz dale ngr nelzdr.

¹⁰ Delc trmrlz-ngrpwzleu mz Yawe nzabrtr-ngrbzku drtwrgu mz nzxplrkr hcsi ngr vea negung, X nzaovxiokr ncblo ngr vea negung.

¹¹ A' mrlzbz bade krkcng tzamrluelr nide, X tzmnc-xglelr nzaodu-zvz-krde nidr.

Zmatq Ngr Natqde

¹² Nigu lr Jerusalem kcng tzangiolr Yawe mz Newz Saeon, Naglqlzku nide, kc tqngi Gct rgu.

^13-14 Murde amqngitibzle naonrx ngr Jerusalem x bz ngr mrnyzgr. Amrlz-zvzle lr mzteadau nyzde, X amnc-zpwxle nigu leplz nedeng amrlx Mz nzrka-krmle bagu da kxmrlzting.

¹⁵ Mzli kc tqycmnepx-ngrde Dalr nrlc nzvz-nqblq-anilr natqde.

¹⁶ Mz mzli r zbao, sncu prlxlvztxde drtc' apule lrpz kxprki. X dcbz vzom mz nrlc apule zsikapu.

¹⁷ X muli-aes rlxom mrkcng amrlx. Murde da amrlx lcng nayclzbzng mz zmatq ngr zbao.

¹⁸ A' mz nzycmne-mou-krde, nrlc kc tqpqpe, X nzwqkr nenq kxpq ayrle-mouleng lue kcng tqngi aes.

¹⁹ X natq lc tqmatq tqpim Yawe bagu, nigu leplz nedeng, Murde nayrlq-angidrku nzalvztr-krdeng x Loukxtr scde.

²⁰ Trpipxpwzleu lou scdeng mz lr mrkzbleng, A' nigu txpwz, mz nzngini-krgu leplz nedeng. Naglqlzku Yawe.