Sam 146 - Natqgu

Sam Kratrtqki-esz'-nzpnu-pwx-nrade-esz'mz (146) Na-abrtxtrpwzku Drtwrgu Mz Yawe

¹ Naglqlzku Yawe! Na-angiox nide mz nabznge.

² Naglqlzx Gct rnge mzli ka tqlube-ngrne, X na-angrlvzx nide.

³ Bzkq abrtrpzku drtwrgu mz kxnzrmailzng, Murde leplz trnzkrlzlru nzarlapx-krdr nigu.

⁴ Nabzng x nzyrtzmqng mz drtc', X mzli lcpwz drtwr kcng tzyrlqlr botxpx-kzpz.

⁵ A' nangi da kxmrlz nzabrtr-krbzku drtwrgu mz Yawe. Murde takitrde mz nzmnc-xgle-krgu Gct r Jekop.

⁶ X Yawe nide Kxrpalz, Kc tqwz-ngrde bongavz, nrlc, x prla, x dalrdrng amrlx. X atutr-zvzle natqdeng amrlx.

⁷ Nzatubqti-krbz Yawe da mz kxnzkxpung tubq. X rka-zvzbz dakxnzng mz kxnzbrtaleng. X aopxbzle drtq kxnzmnclzbzng mz mq enqmi rdrng.

^8-9 X nide kz kx aopxbzle mzku. X atulzmle kxnzobqszong. Yawe aclvele lr mrkzbleng kx mnckung badr. X okatrle kxnzbzszng x kxnzabzong. Mrlztile kxnztubq nedeng, A' odatile drtwr kcng tzyrlq kxdrka'-ngrng.

¹⁰ Yawe ni-alode King! Nzaclvekr Gct rgu, nigu lr Jerusalem, tqvzpe tqvzpe. Naglqlzku Yawe!