Sam 145 - Natqgu

Sam Kratrtqki-esz'-nzpnu-pwx-nrade-nzlvqn (145) Zluli X Zmatq Ngr Yawe Kzdq Nabz Ngr A, B, C

Nabz ngr nzrglqpxngr ne Devet.

¹ Awi-zvzbo bam mz nzglqpx-krnge nim, Murde nim Gct rnge x mnclzbo bam.

² Bilvzx nim mz nzawi-krbo bam. X sa naglqpx-zvzx nim mz zbq kang kqlu.

³ Clveq nrlc mz zmatq ngrm kx trpnzngr kxrkrlz. Yawe, myatxlz-esz'ngrn x takitrde nzrglqlzngr nim.

⁴ Doa nemqng sa nayapwxti-zvzbzlr mz doa nedrng, Da kcng tqetuting tqmatq tqaletiqng.

⁵ Eu, x sa na-aoti-zvz-kzx drtwrnge nzwz-krmqng kxmrlzvxing, X nzetu-esz'ngr-krm mz zmatq.

⁶ Gct, sa nayapwxtipx leplz da kxnzkctipxng kcng tqwz-ngrn. X sa napipxx nzmyalz-esz'ngr-krm.

^7-8 Ipq-aniq leplz murde yc mz drtwrm nidr. Murde nivz lrm x nzaodu-krm tqyc tqyc. Jzsiq leplz mz nztubqngr x sa na-angrlvzlr nim. Sa nalepxlr nrpa ngr nzmrlz-esz'ngr-krm.

⁹ Kxetu, mrlztiq leplz amrlx, X yc zlwz mz drtwrm doa amrlx kcng tqwz-ngrn.

¹⁰ Leplz nemqng amrlx sa na-awibzng bam, X doa amrlx kcng tqwz-ngrn sa naglqlzlr nim.

¹¹ Mz nrlc tulvzo, sa nayapwxtipxlr nzmyalz-esz'ngr-krm, X nzetukr zmatq ngrm mz nzngini-krm king.

¹² Nrpa ngr nzwz-krmqng etu, mz da kxmrlzting kcng tqwz-ngrn mz nzaclve-krm, Sa nakrlz leplz amrlx.

¹³ Obqom mz nrlc mz nzaclve-krm kc tqyc tqyc, X nzngini-krm king tqvzpe tqvzpe. Pipx-zvzq natq kx na-angidatiq, X aelwapx-zvzq nivz lrm mz da amrlx kcng tqaleq.

¹⁴ Rngiscm zmatq kx okatrle leplz kcng tzkxpung, X axplrle nabz leplz kcng tqtalvzo.

¹⁵ Sa narkabzme dakxnzng mz kxnzlung amrlx, Mz nzmnc-xgle-krdr nim mz da amrlx.

¹⁶ Tekqtrq nzbrtale-krdr mz nzakrlc-krbzme nelzdr, X drtwrdr esatxpx zpwx.

¹⁷ Vz zvz nzale-krm da kx tubq-esz'ngr, X aelwapx-zvzq nivz lrm mz da amrlx kcng tqaleq.

¹⁸ Wxbu-aepztrpzme mz krkcng tzkqlelr nim, Mz nzbrti-zpwxkr drtwrdr nim.

¹⁹ Xlrq nzyrnikr leplz kcng tzamrluelr nim, X ayzlubzme natqdr mz nzarlapx-krm nidr.

²⁰ Yawe, tu-zvzbzme mz nibr leplz kx nzmrlztilr nim, A' odati-atwrnr-ngrn kxdrka'-ngrng.

²¹ Zbq kalvz sa naglqlzx nim. X krkcng tzlung tqwz-ngrn, nzangio-krdr nim tqvzpe tqvzpe.