Sam 140 - Natqgu

Sam Kratrtqki-esz'-nzpnu-pwx (140) Kxna-atrkatilr Ninge Arlapxbz Ninge

Nabz ne Devet kx yrbzle mz kxrmailz ngr dzbe kxnzngrng.

¹ Yawe, arlapxbz ninge mz kxdrka'-ngrng Kcng tzsuti drtwrdr nzatrkati-krdr ninge.

² Nzryrlq-zvzng drtwr kxtrka mz nabzdr, X nzapqtr-zvzlr drtwr ngr nzotangr.

³ Natqdr nzlvati apule nipna kr ningidoe kc tqrtq, Mz nzrpikitingr x nzrpibqtingr.

Mz Mq Enqmi Rngeng

⁴ Yawe, arlapxbz ninge mz zmatq ngrdr. X aclve-angidrbz ninge mz krkcng tzryrlqng drtwr kx na-atrkati-ngrdr ninge.

⁵ Sc tzglqpx-lzbqng nzamwi-kapqlr trtxki kx naprtz-ngrne mz nzatu-krdr br mz nzti rnge. X tzryrlqng drtwr kx nalolvz-ngrdr ninge.

Nim Gct Rnge

⁶ Yawe, xlrm nzkrka'-krnge, Murde rpi-zvzbo bam kx, “Yawe, nim Gct rnge.”

⁷ Kxetu rnge, nzxplr-krm arlapxle ninge. X amyaq narnge mz nzvecngr.

⁸ Bzkq rlr-ngrbzme nzngidatikr drtwr kcng tzyrlq kxdrka'-ngrng lcng Mz nzbilvz-krdr nzlolvz-krdr ninge, kxmule-esz' nzsuti zlwz drtwrdr.

Ayrplapx Nidr

⁹ Enqmi lcng tztu-ngalelvzlr ninge. Batrpz nzayzlu-krbz badr natq ngr zngya kcng tzpimlr bange, murde nangq-moule nidr.

¹⁰ X nyr natatiom nangc-ngrdr, X nartctiongr nidr mz gq kx trnarlapx-ngrdru.

¹¹ Suti drtwrnge kx krkcng tzpokiang nzmnc-krdr mz drtc' natangqneo. X da kxtrka nadwatibzle krkcng tzota-zvzng mz nzodati-krde nidr.

Okatr Ninge

¹² Yawe, krlzx kx tu-zvzbzme mz nibr kx trpnzngr scde zmatq, X okatrq kxnzkxpung mz nzatubqti-krm da kx vz-rbr.

¹³ Leplz kxnztubqng sa na-awibzng bam, X namnc-zvzamu badr.