Sam 139 - Natqgu

Sam Kratrtqki-esz'-nzpnu-tq-nrade-rpwxmz (139) Nzrkrlzkr Yawe Myatxlz-esz'ngr X Krlz-kzle Nqmq Nr Nabzm Obqplxq Nabznge

Nabz ne Devet kx yrbzle mz kxrmailz ngr dzbe kxnzngrng.

¹ Yawe, obqplxq nabznge, X krlz-atwrnr-ngrn ninge.

² Krlzq da amrlx kcng tqalex. Kxmule-esz' mncme rlru, a' krlz-zvzq nzao-krnge drtwrnge.

³ Kxmule-esz' wzx o amax, a' sa tqmc-zvzq ninge. X krlz-kaiq da amrlx kcng nartrngztibo mz zbq kxesz'.

⁴ Abzo pnz mzli kc trycmneka-ngrne Nzkrlz-kai-krm natq kznike napixng.

⁵ Zmatq ngrm okatrle ninge Mz nztu-ngalelvz-krde ninge.

⁶ Nzkrlz-krm ninge etu zlwz. X trtakitrpwc'u nzrkrlz-krm.

Esz'-ngrn Nrlc

⁷ ?Drlve kc navzkix murde trnamcwq ninge? Trpnzngr kxnamule lc murde esz'-ngrn nrlc.

⁸ X kxmule-esz' vzdzx Heven, a' sc tqmncq elr. X kxmule-esz' bzx x nzyrtzmqnge, a' sc tqmnc-kzq elr.

⁹ Kxmule-esz' alilvc-kzx me prkilzm nepi O me takiole,

¹⁰ A' sc tqmncq elr mz nzokatr-krm ninge X nzrmailz-krm ninge mz mqm.

¹¹ Kxmule-esz' mnc-kapqx mz nzlo X mz drtwrnge nrlckxngrlx nangitx nrlckxbq,

¹² A' nzlo x nrlckxbq rblx nzamnc-kapq-krdr ninge, Murde nzlo x zyzlr kxnamu-txpwzlr esz' mz nzobq-krm.

Nzlrmztio-krm Ninge

^13-15 Murde mzli kc tqmclq ninge mz nelz lxenge Nim txpwz kx rkrlz nzmnc-lrpipx-krmc mrlcde. Wz-ngrn dalr nrkrdrtqnge x nrvr rngeng. X amwitr-lxblr-kzqng amrlx, mz nzvz-nqblq-krde me pnz drtwrm. X kctipxx x awitx-ngrbo bam Nzlrmztio-krm ninge.

¹⁶ X mzli kc trnzmckangr mzke', Yrlqpe-kaiq me nakrlzbz me nangi bz ngr nzlu-krnge.

Rblxm Bange Nzao-krm Drtwrm

¹⁷ A' rblxm bange nzkrlz-angidr-krnge nzao-krm drtwrm Murde nzkqlu-zlwzng.

¹⁸ A' nzmu narlwxxleng drtwrnge mrbrtrpz, Murde nzmyaszpxlr drta' ngr prla amrlx. X kxmule-esz' nayrkrpx nzrlwx-krngeleng, A' tryatrkapc' nzkrlz-angidr-krnge nim.

Kxdrka'-ngrng

¹⁹ Murde rblxbep bange drtwr ngr nqmq krm. ?Memule tqasa-ngrn nzayrplapx-krm kxdrka'-ngrng? ?Myx kxmule trnamilxtxokalq nidr?

²⁰ Murde nzpiti-ngrdr nim natq kxtrka, X nzrnzlvzolr nqmq krm.

^21-22 Yawe, pxtxpx-ngrne krkcng tzpxtxpx-ngrdr nim x ni-kzdr enqmi rngeng. Murde trnzmnclzpwzung mz zmatq ngrm.

Aelwa-ngrm Bange Nqmq Krnge Kxtrka

²³ Gct, obqplxti zpwx nqmq nr nabznge Mz nzkrlz-krm nzao-krnge drtwrnge.

²⁴ Murde na-aelwa-ngrme bange nqmq krnge kxtrka, X namailzq ninge mz nzti kxtubq.