Sam 132 - Natqgu

Sam Kratrtqki-esz'-nzpnu-tq-nrade-li (132) Nzesz'tikr Drtwr Yawe Ncdr Devet Devet Suti Drtwrde Nzrwzngr Mangr-nzangiongr Yawe

Nabz kx nzngrnelzngr Jerusalem mz nzangiongr.

¹ Yawe, na-aoti drtwrm nzkxpukr Devet, Mz nzwztr-krbzle bam.

² Nim Gct kc tqrninr tqangio Jekop. X Devet esalzbz bam.

^3-4 Rpibzle kx, “Yawe, trtxpnzngr nzvz-krnge ma nyznge o mz nelvq nyznge, X trtxpnzngr nzama-krnge x nzmwi-krnge,

⁵ A' nawzti-kaix dq ma kx namnc-ngrn, Mz nzngini-krm Gct r Jekop.”

Devet Rmctile Bokis Kc Tqyclz-ngrm Nzesz'tikr Drtwrdr Badr Gct

⁶ Mzli kc Devet badr ncblo nedeng tzmnc-ngrdr Efrata, Nzxlrlr nrpa ngr Bokis kc tqyclz-ngrm Nzesz'tikr Drtwrdr Badr Gct. X sc tzrmctipelr mz mztea Jerim mz nrlarnrlc lcde.

⁷ X sc tzrpipelr kx, “Naglqpeku Bokis lc mz Tentkxtr nyz Yawe. Mz nzangio-krgu nide mrkc tqwxbu-ngrde mz tron.”

⁸ X sc tzrpipebzlr mz Gct kx, “Yawe, vzm mz Tentkxtr nyzm, Murde namnc-zvzq mrkc tqycngr Bokis ngr zmatq ngrm.

⁹ Murde pris nemqng nayapwxtipxbzlr nztubq-esz'ngr-krm mz leplz nedrng, Kcng na-angrlvzlr nim.”

Nzesz'tikr Drtwr Yawe Ncdr Devet

¹⁰ Yawe, mzli ka bzkq pxtxpx-ngrn king rgr kc tqmcpxbzme, A' atutr nzesalz-krbzme mz kxnzawz nem, King Devet.

¹¹ Murde esalz-ngrbzme bade da kx trnzkatxu, Mz nzrpi-krbzme bade kx, “Sa nayrlqbo dq mrlxm kx nanginide king kx na-aclvele lr Israel mz nibrm.

¹² X nzmu mrlxdrng nayrlq-angidrlr nzesz'tikr drtwrgr badr, X navz-nqblqlr natqnge kc tqkapxbo badr, Sa nangini-zvzdr king, Badr mrlxdrng, tqyc tqyc.”

Mevalu Kc Navzpxm Mz Nqvi Lr Devet

¹³ Yawe, rlxtibzkr nzamrlz-krm king nem. Murde mcpxq Jerusalem nangi mztea nyzm,

¹⁴ Mz nzrpi-krm kx, “Krlc mztea kx namnc-alo-ngrne, Mz nzvz-nqblq-krde me pnz drtwrnge.

¹⁵ Sa nakabo mz lr mztea nyznge lc da kxmrlzting kxkqlu. X sa na-aputrx kxtrnzrngiscung murde nelzdr nakrlc x naesatxpx zpwx.

¹⁶ Sa nabatrpo mz pris nengeng nzyapwxtipx-krbzlr mz leplz nengeng nzarlapx-krnge nidr, Murde leplz kxnztr lcng namalqlvzlr ninge.

¹⁷ Sa nayrlqx king kc tqmatq Jerusalem kx navzpxm mz nqvi lr Devet, X nzaclve-krde trtxpnzngr nzesaki-krde.

¹⁸ Sa na-amyalzx nide mz nzalao-krbo kraon mz narde, A' sa nabatrpo nzmyakr drtq enqmi rdeng.”