Sam 124 - Natqgu

Sam Kratrtqki-esz'-nzpnu-li-nrade-pwx (124) Yawe Arlapxle Leplz Nedeng

Nabz ne Devet kx nzngrnelzngr Jerusalem mz nzangiongr.

¹ Nigu lr Israel nakrlz-angidrku Kx Yawe ngi-te-zvzku badr mz nzotangr.

² X mz nzngi-te-zvz-krgu badr Mzli kc enqmi rgung nzrpilr na-atrkati-ngrdr nigu,

³ Rblxbz badr nzmilxtxo-krdr nigu Mz nzngyati-zlwzkr drtwrdr nigu.

^4-5 X trnznibqlru nigu mz nzapu-krdr srkau kx mrilvzole nigu. X nrc kxetu ngr srkau lc trabooleu nigu.

⁶ Delc na-awi-ngrbzku mz Yawe Mz trnzrlr-krpwzleu nigu mz mq enqmi rgung.

⁷ Mzli lc sc tqapupeku utc mz nzdwapx-krmgu mz br sc kxnzmwang, X drtqgu opxpe murde Yawe pingebzle br scdr.

⁸ Yawe nide Kxrpalz kc tqwz-ngrde bongavz x drtc', X Mevalu kc tqokatrle nigu, mz zmatq drtqde.