Sam 122 - Natqgu

Sam Kratrtqki-esz'-nzpnu-li-nrade-li (122) Jerusalem Ngi Mzteadau Nyz Yawe

Nabz ne Devet kx nzngrnelzngr Jerusalem mz nzangiongr.

^1-2 Drtwrnge elalzm mz nzrpi-ngrm bange kx, “Navzdzpeku mz Mangr-nzangiongr Yawe.” Zbz sc tqvztrpekr mz naobz ngr mzteadau nyzde.

³ Jerusalem lc nzlrmztio nzrwzngr, X mzte opx nzmwitr-lxblrkr ma ngrdeng.

⁴ Nigu neidu lr Israel vzmgu mrlcde mz nzawi-krbzku mz Yawe, Da kc tqwai nzpi-krdele.

⁵ X Jerusalem ngi mzteadau nyz king rgung, kcng tzvzpxmqng mz nqvi lr Devet. X nzaclvelr leplz nedrng elr mz nzwxbuo-krdr mz tron.

^6-7 Delc, nakrka'-ngrgu Jerusalem mz nzrpi-krgu kx, “Gct rgr, aclve zpwx nigr lr Jerusalem, Murde leplz nemqng kcng tzmrlztilr nim Namnc-zpwxng mz ma nyzdr, X narmctilr nrwx mz nzmncpx-krmlr mz drkq ngr mzteadau nyzm.

^8-9 Yawe, rlxtibzkr bam Kx na-aclve-kzpzme lr mrnyzgr x kztegrng kcng tzmncng elr. Amrlz zvz leplz amrlx kcng tzmncng elr Mz nzmrlzti-krdr Mangr-nzangiongr nim. Eu, angida.”