Sam 119 - Natqgu

Sam Kratrtqki-esz'-nzpnu-esz'-nrade-rpwxmz (119) Yawe, Natqm Mrlzvxi Kzdq Nabz Ngr A, B, C Alvztr-zvz-ngrn Ninge mz Natqm

Alvztr-zvz-ngrn Ninge mz Natqm

¹ Awi Yawe! Namrlzbz mz leplz kx trnzvz-rbrung, A' nzvz-nqblqlr Loukxtr scm,

² X namrlz-kzpz mz krkcng tzlxngitilr natqm, X nzrtangrtilr nim mz nabzdr atwrnrngr,

³ X krkcng tzalelr da kxtubq, X nzo-zlilr lrpzki rm.

⁴ Alvztr-zvzq nigr Murde nalolvz-amqngikr nqmq krm.

⁵ Navz zvz Nzrtangrti-krnge me pnz drtwrm.

⁶ Murde ma tqmyangr drtqnge Mz nzaoti-zvzkr drtwrnge Nzryrngrkxtr.

⁷ Alqngitipeq ninge, Glqlz-ngrne nim nztubqkr nabznge.

⁸ Alex da kx pitimeng bange. A' bzkq amnctxn ninge esz'-krnge.

Bilvz-zlwzx Nzti Rm

Bilvz-zlwzx Nzti Rm

^9-10 Bzkq rlr-ngrme nzrlasz-krnge nim, Murde sa tqabzx nzwztr-krbo bam mz drtwr kxpq. Nzlolvz-amqngikr obla natqm okatrle nide Mz nztu-amqngi-krde mz nzmncngr kxtubq.

¹¹ Abrtz-ngrne Nzryrngrkxtr Murde natubq-zvzbo mz nzobq-krm.

¹² Yawe, glqlzx nim. X suti drtwrnge nzkrlz-zpwx-krnge nqmq krm.

¹³ Natqnge etu zvz Mz nzpipx-krnge Loukxtr scm.

¹⁴ Nzabrtzngr kx vzpxm mz nzvz-nqblq-krnge nim Myaszpxle nzrngisc-krnge trau kxkqlu.

¹⁵ Nadcpx mz drtwrnge me pnz drtwrm. Mz nzaoti-zvzkr drtwrnge nzalvztr-krmqng.

¹⁶ Bilvz-zlwzx nzti rm, X trmrbrtru mz drtwrnge natqm.

Clve Ninge Mz Loukxtr Scm

Clve Ninge Mz Loukxtr Scm

¹⁷ Clve ninge murde ninge kxnzawz nem, X nayrlq-zvzx natqm mz nzmnc-krnge.

¹⁸ Okatrp ninge mz nzrmcti-krnge Da kxmrlzting kx nzprpxmqng mz Loukxtr scm.

¹⁹ Ninge kxvztimle nrlc. Bzkq yrlq-kapqme bange me pnz drtwrm.

²⁰ Pq zvz mz drtwrnge Nzkrlz-krnge nqmq krm.

²¹ Ayrplapxq kxnzglqpx-lzbqng Kcng tzrnzlvzolr natqm.

²² Bzkq rlrpx-ngrn nzobqszo-krdr x nzyrpalelvz-krdr ninge, Murde vz-nqblqx natqm.

²³ X kxmule-esz' kxnzetung nzpikitilr ninge, A' sa tqotr-zvzngr drtwrnge nzalvztr-krmqng.

²⁴ Clve ninge mz Nzryrngrkxtr Murde abrtz-ngrne nzmailz-krdr ninge.

Da Kx Mailzle Ninge Nangi Lrpzki Rm

Da Kx Mailzle Ninge Nangi Lrpzki Rm

²⁵ Drtqnge mewetx-zlwzpe x ycpe pipz nzbz-krnge. Ka-mop nzlungr bange, mz nzvz-nqblq-krde natqm.

²⁶ Mzli kc tqplzpx-ngrbo bam alwx rngeng, ayzlu-ngrme natqnge, X alvztrpe' bange nqmq krm.

²⁷ Okatrp ninge mz nzrkrlz-krnge Loukxtr scm, Murde na-aoti zvz drtwrnge nzwz-krmqng kcng tqmyalz.

²⁸ Nzrtxlvzlzkr nzvzkr drtwrnge etutx-zlwzpe. Amqtrp drtwrnge da kc tqwai nzesalz-krmle.

²⁹ Okatrp ninge mz nzo-zli-zvz-krnge nzti kxtubq, X alvztrp bange Nzryrngrkxtr mz zmrlz ngrm.

³⁰ Pnzpe drtwrnge kx navz-nqblq-zvzpex nim, Mz nzale-zvz-krnge me pnz drtwrm.

³¹ Yawe, bzkq rlrpx-ngrn nzamyati-ngrm drtqnge, Murde lolvz-amqngix nzalvztr-krmqng.

³² Da kx mailzle ninge nangi lrpzki rm Mz nzokatr-krm ninge.

Esalz-ngrn X Angidatiq Natqm

Esalz-ngrn X Angidatiq Natqm

³³ Eu Yawe, alvztrp bange me pnz drtwrm, Murde nayrlq-zvzx.

³⁴ X okatrp ninge mz nzvz-nqblq-krnge Loukxtr scm, Murde naesz'-ngrde nabznge.

³⁵ Abrtz-ngrne lrpzki rm Mrkc tqmailz-zvz-ngrn ninge.

³⁶ Okatrp ninge mz nzpqtikr drtwrnge natqm, Murde myaszpxle nzrngisc-krnge da kxkqlu.

³⁷ X bzkq rlr-ngrme nzsutikr drtwrnge da kxmane, A' axplr-mop ninge mz nzo-zli-krnge nzti rm.

³⁸ Angidatim bange nzesalz-krmqng, Da kc tqwaibzme mz leplz kcng tzamrluelr nim.

³⁹ Okatrp ninge murde mwxlrtix enqmi rngeng nzxtrnga-krdr ninge. A' mrlz-esz'ngrm bange nzpnana-krmqng.

⁴⁰ Esalz-ngrm bange kx na-alvztrq ninge, Murde nztubq-krm naka-mople bange nzxplrngr.

Gct, Brti Drtwrnge Drtwr Kcng Tqyrlqqng

Gct, Brti Drtwrnge Drtwr Kcng Tqyrlqqng

⁴¹ Gct, arlapx ninge mz nivz lrm, Mz nzangidati-krm nzesalz-krmqng.

⁴² Murde na-ayzlu-ngrbo natq krkcng tzyrpalelvzlr ninge, Mz nzbrtikr drtwrnge natqm.

⁴³ Okatrp ninge mz nzrpi-zvz-krnge da angidr, Murde brti kz drtwrnge drtwr kcng tqyrlqqng.

⁴⁴ X nzmqngitr-zlwzkr drtwrnge mz Loukxtr scm Tqvzpe, tqvzpe.

⁴⁵ X drtqnge sa naopx mz nzvzne-krngeng Murde o-zlix lrpzki rm.

⁴⁶ X trtxpnzngr nzmyamikr naonge Nzpipx-krbo natqm mz kxnzetung.

^47-48 Gct, abrtz-ngrne nzyrlq-angidr-krnge Nqmq krm x me pnz drtwrm. Murde nzmrlzmqng bange x nzmatqng mz drtwrnge. X na-aoti zvz drtwrnge nzalvztr-krmqng.

Ipqpeq Ninge Mz Nzdcpxkr Mz Drtwrm Nzesalz-krm

Ipqpeq Ninge Mz Nzdcpxkr Mz Drtwrm Nzesalz-krm

⁴⁹ Ipqpeq ninge mz nzdcpxkr mz drtwrm nzesalz-krm. Murde obqtipxx zmrlz ngrm.

⁵⁰ X amqtrple drtwrnge mz mzlir nzkxpungr. Murde rmcti-ngrne nzlungr mz nzrlwx-krnge Loukxtr scm.

⁵¹ Kxmule-esz' kxnzglqpx-lzbqng nzxtrnga-ngrdr ninge, A' tresablqtiwxu Nzryrngrkxtr.

⁵² Yawe, mz nzaotr-zvzkr drtwrnge Lou scm kc bqnc, Okatrple ninge.

⁵³ Drtwrnge apulzmle nyr, Mz nzpxtxpxkr kxdrka'-ngrng nqmq krm.

⁵⁴ Mzli ka tqlube-ngrne mz nrlc, Natqm nangi zvz nabz nenge.

⁵⁵ Yawe, mwible-zvzx nim mz nrlckxbq, X suti drtwrnge nzyrlq-angidr-krnge me pnz drtwrm.

⁵⁶ Iklr ninge murde nabznge napq, X na-ale-zvzx nzalvztr-krmqng.

Jzs Ninge, Murde Suti Txpwz Drtwrnge Nim

Jzs Ninge, Murde Suti Txpwz Drtwrnge Nim

⁵⁷ Jzs ninge, murde suti txpwz drtwrnge nim, X mrlzm bange nzlolvz-amqngi-krnge natqm.

⁵⁸ Mz nabznge atwrnrngr, rlxtibo bam Nzmrlzti-krm ninge da kc tqwai nzesalz-krmle.

⁵⁹ Mzli kc tqdwa-rbrti-ngrne lrpzki rnge mz nzvz-nqblq-krnge nim, Yzlu-mopwc' nzo-zli-krnge nzti rm.

⁶⁰ X trasatiwxu nzyrlq-krnge Loukxtr scm. A' rnekititxpwo nzale-krnge me pnz drtwrm.

⁶¹ X kxmule-esz' prtzx mz trtxki sc kxdrka'-ngrng, A' trmrbrtru mz drtwrnge Nzryrngrkxtr.

⁶² Tulzmc mz nzawi-krbo bam mzli kc mz aurnrlc, Murde drtwr kcng tqyrlqq tubq-esz'ngr.

⁶³ Ninge kzte krkcng tzamrluelr nim, Tzalelr nzalvztr-krmqng.

⁶⁴ Yawe, mz nzaodu-krm kc tqyc-ngalelvzle nrlc tulvzo, Alvztrp bange nqmq krm.

Kxakrlz, Alvztrp Bange Lrpzki Rm

Kxakrlz, Alvztrp Bange Lrpzki Rm

⁶⁵ Kxetu, aleme bange da kxmrlz, Mz nzvz-nqblq-krde nzesalz-krm.

⁶⁶ Kxakrlz, alvztrp bange nzrkrlzngr x drtwr kxmrlz, Mz nzlxngiti-krnge Nzryrngrkxtr.

⁶⁷ Mzli kc ena vz-rbrpex, x ayrplapxq ninge, A' mzli ka ale-zvzpex da kxtubq mz nzobq-krm.

⁶⁸ Mz nzmrlz-esz'ngr-krm x nqmq krm kx mrlzvxi Alvztrp bange nqmq krm.

^69-70 Drtwrnge elalzm mz Loukxtr scm. A' kxnzglqpx-lzbqng trpnzngr nzrkrlz-krdr. Kxmule-esz' nzpokiatitrlr ninge, A' lolvz-amqngi-zvzx nzalvztr-krm mz drtwr kxbr.

⁷¹ Mrlzm bange nzayrplapx-krm ninge, Murde nakrlz-ngrne nzvz-rbr-krnge.

⁷² Kxakrlz, natqm nzmrlz-krmle bange Myaszpxle blzmr trau mz nrlc.

Loukxtr Scm Mrlzm Bange

Loukxtr Scm Mrlzm Bange

⁷³ Lalztqm mz nzkrka'-krnge murde nakrlzx me pnz drtwrm, Murde wz-ngrn ninge x aclve-angidrq ninge.

⁷⁴ Krkcng tzamrluelr nim na-abrtzlvzlr ninge Mz nzlxngiti-krnge natqm.

⁷⁵ Yawe, krlzx kx takitrde nzayrplapx-krm ninge Murde vz zvz nzokatr-krm leplz nemqng.

⁷⁶ Amqtrp drtwrnge mz nzaodu-zvz-krm ninge, Da kc tqwai nzesalz-krme bange.

⁷⁷ Mz nzabrtzlvz-krnge Loukxtr, Nayc mz drtwrm ninge, murde ma tqbzx.

⁷⁸ Amyatxbz drtq kxnzglqpx-lzbqng mz nzpokiatitr-krdr ninge, Murde aoti zvz drtwrnge nzalvztr-krm.

⁷⁹ Batrpz mz kxnzamrluelr nim nzaxvctr-lzbq-krmlr bange, Krkcng tzkrlz-angidrlr Loukxtr scm.

⁸⁰ Lod, batrpz mz nabznge nztubq-krde mz nzobq-krm, Murde drtqnge ma tqmya.

Mevalu, Mailz Ninge Murde Navz-nqblqx Me Pnz Drtwrm

Mevalu, Mailz Ninge Murde Navz-nqblqx Me Pnz Drtwrm

^81-82 Mevalu, mewepengr drtqnge x mzke' ngqbqtxtrpebz Mz nzaenzli-krnge nim. ?Myx mzli kx na-arlapx-ngrn ninge, Mz nzangidati-krm nzesalz-krm kc tqbrti drtwrnge?

⁸³ Kxmule-esz' nzobqszonge apux da kx nzrtctxpengr, A' dcpx zvz mz drtwrnge me pnz drtwrm.

⁸⁴ ?Myx mzli kx nayrkrpxngr nzkxpu-krngeng? ?X myx mzli kx na-ayrplapx-ngrn krkcng tzatrkatilr ninge?

⁸⁵ Kxnzglqpx-lzbqng nzekqng gq kx nangi trtxki rnge, Mz nzpxtxpx-krdr Loukxtr scm.

⁸⁶ Mailz ninge mz nzbrtikr drtwrnge Nzryrngrkxtrng amrlx. Murde trpnzngr badr nou nzatrkati-krdr ninge.

⁸⁷ Kxmule-esz' ycpwz pipz nzayrkrpx-krdr ninge, A' sc tqlolvz-amqngix nzalvztr-krmqng.

⁸⁸ Mevalu, arlapx ninge mz nzaodu-krm ninge. Murde nayrlq-angidrx natqm.

Natqm Tqyc Tqyc

Natqm Tqyc Tqyc

⁸⁹ Natqm tqyc, tqyc, X yc amqngi zvz Heven.

⁹⁰ Wz-ngrn nrlc x yc amqngi zvz. Delc tqbrti-zvzngr drtwr nim.

⁹¹ Da amrlx mz nrlc nzvz-nqblqlr me pnz drtwrm, Murde nzwztrpzng bam.

⁹² Trbz-ngrneu nzkxpu-krngeng, Murde Loukxtr scm okatrle ninge mz nzaelalz-krmle drtwrnge.

⁹³ X trtxpnzngr nzmrbrtrkr mz drtwrnge Nzryrngrkxtrng, Murde nzrpwa'-ngrmlr bange mz nzvz-rbrngr.

⁹⁴ Arlapx ninge, murde ninge doa nem, X abz-zvzx nzale-krnge nzalvztr-krmqng.

⁹⁵ Kxmule-esz' kxdrka'-ngrng nzyrlqlr br ngr nznibq-krdr ninge, A' na-aoti zvz drtwrnge nqmq krm.

⁹⁶ Natqm tqyc tqyc, Kxmule-esz' da kxmyapxbz amrlx nzyrkrpxng,

Okatrp Ninge Mz Nzo-zli-krnge Nzti Rm

Okatrp Ninge Mz Nzo-zli-krnge Nzti Rm

⁹⁷ Oliq-zvzx nzaotikr drtwrnge Loukxtr scm, Murde mrlz-zlwzm bange.

⁹⁸ Nzrkrlz-krnge myaszpxle enqmi rngeng, Murde Nzryrngrkxtr yc zvz mz drtwrnge.

⁹⁹ X nzwzkr narnge myaszpxle kxnzalvztrlr ninge, Murde ale-zvzx me pnz drtwrm.

¹⁰⁰ X nzyrplapx-krnge myaszpxle lrtzlvzng, Murde yrlq-angidrx natq kx kame bange.

¹⁰¹ Yrlqpx-lzbqnge mz nzmncngr kxdrka'ngr, Mz nzvz-nqblq-krnge da kx tubq mz nzobq-krm.

¹⁰² Trpxtxpx-ngrneu drtwr kcng tqyrlqq, Murde nzalvztrlr ninge.

¹⁰³ Natqm nzlqngi-esz'ngr-krde mz nzxlrngr Myaszpxle nzmrlzkr dakxnzng amrlx.

¹⁰⁴ Okatr-zvzq ninge mz nzalvztr-krm murde nakrlzx nzti kxtubq. Delc tqmamwe-ngrne nqmq kx vz-rbr amrlx.

Pqtr Zvz Mz Drtwrnge Natqm

Pqtr Zvz Mz Drtwrnge Natqm

¹⁰⁵ Pqtr zvz mz drtwrnge natqm, Kc tqngi zyzlr ngr nzti rnge mz nzmailz-krm ninge.

¹⁰⁶ Nzesalz-krngeng nayrlq-angidr-zvzxng, Mz nzo-zli-krnge nztubqkr lrpzki rm.

¹⁰⁷ Okatrp ninge da kc tqwai nzesalz-krmle, Murde nzkxpu-krngeng amrlx ma tznibqlr ninge.

¹⁰⁸ Yawe, alvztrp bange nzaolvz-krmqng X abrtzlvz nabz nenge mz nzangrlvz-krnge nim.

¹⁰⁹ Kxmule-esz' da kxtrka prtzm bange, A' trmrbrtru mz drtwrnge Loukxtr scm.

¹¹⁰ X kxmule-esz' kxdrka'-ngrng nzamwitiolr ninge trtxki, A' vz zvz nzatutr-krnge nzalvztr-krmqng.

¹¹¹ X lolvz-amqngi-zvzx Nzryrngrkxtrng, Murde nzaelalzmlr drtwrnge.

¹¹² Pnzpe drtwrnge kx navz-nqblq-zvzx me pnz drtwrm, Murde nzokatrngr kx vzpxm elr vztx alo.

Rblxm Bange Nzmrlzti-krnge Krkcng Drtwrdr Tqlitrpz Bam

Rblxm Bange Nzmrlzti-krnge Krkcng Drtwrdr Tqlitrpz Bam

¹¹³ Rblxm bange nzmrlzti-krnge krkcng drtwrdr tqlitrpz bam, A' mrlz-zlwzm bange Loukxtr scm.

¹¹⁴ Nim me rlakitrx x temz ngr lomrnge kc tqyrputrngr nipna, X abrtrpo drtwrnge mz natqm.

¹¹⁵ Esablqtix kxdrka'-ngrng Murde navz-nqblqx nqmq krm.

¹¹⁶ Bzkq mya ngr drtqnge nzbrtikr drtwrnge nim, A' arlapx ninge da kc tqwai nzesalz-krmle, murde ma tqbzx.

¹¹⁷ Natu-ngrme mz nibrnge mz nzarlapx-krm ninge, Murde namatq zvz mz drtwrnge drtwr kcng tqyrlqq.

¹¹⁸ Pxtxpx-ngrn krkcng tzpxtxpx-ngrdr Nzryrngrkxtr. Murde nzesabrng x nzpokiang.

¹¹⁹ Obqszoq kxdrka'-ngrng mz nzapu-krdr dcvi. Delc tqmrlz-ngrm bange nzalvztr-krmqng.

¹²⁰ Rnrcti-lzbqnge mz nzmwxlrti-krnge nim, Murde ma trtubqwxu mz nzobq-krm.

Suti Drtwrnge Nzryrngrkxtr

Suti Drtwrnge Nzryrngrkxtr

¹²¹ Suti drtwrnge nzarlapx-krme ninge mz mq enqmi rngeng, Murde nqmq krnge rsakrlrngr x tubq.

¹²² Bzkq rlr-ngrbzme mz kxnzglqpx-lzbqng nzatrkati-krdr ninge. A' amnc zpwx ninge.

¹²³ Mzke' ngqbqtxtrpebz mz nzaenzli-krnge Nzvz-nqblq-krm nztubqkr nzesalz-krm.

¹²⁴ Alvztrp bange nqmq krm Mz nzaodu-zvz-krm ninge.

¹²⁵ Okatrp nzyrplapx-krnge, Murde nakrlz-angidrx nzaolvz-krmqng.

¹²⁶ Yawe, mzli r nzayrplapx-krm leplz dekape. Murde nzrnzlvzo-zvzlr Loukxtr scm.

¹²⁷ Mz nzmu-krde lcde, natqm nzmrlz-krmle bange Myaszpxle da kx lqlwx amrlx.

¹²⁸ Sa natubq-zvzm bange nzalvztr-krmqng amrlx. X mamwe-ngrne nqmq amrlx kx vz-rbr.

Takitrde Nzlolvz-amqngi-krnge Nzalvztr-krmqng

Takitrde Nzlolvz-amqngi-krnge Nzalvztr-krmqng

¹²⁹ Takitrde nzlolvz-amqngi-krnge nzalvztr-krmqng Murde nzmrlz-zlwzng.

¹³⁰ Natqm apule zyzlr, Murde aelwa-ngrbzle lrpzki kxtubq mz leplz amrlx.

¹³¹ Nzsutikr drtwrnge nqmq krm apule nzbrlxkztikr drtwrnge lue, Murde narmcti-ngrne nzlungr angidr.

¹³² Nayc mz drtwrm ninge, Da kc tqwaibzme mz krkcng tzamrluelr nim.

¹³³ Okatrp ninge mz nzvz-nqblq-krnge me pnz drtwrm, Murde alwx ma tqmailz-rbrle ninge.

¹³⁴ Arlapxbz ninge mz mq leplz kcng tzakxputilr ninge, Murde nayrlq-zvzx da kx tubq mz nzobq-krm.

¹³⁵ Okatrp ninge mz nzxngi-krnge nim, X alvztrp bange Nzryrngrkxtr.

¹³⁶ Trtakitrdeu nzrnzlvzongr Loukxtr scm. X yrnitx-zlwz-ngrne alwx ngrdr lc.

Vz-nqblq-zvzq Nzmncngr Kxtubq

Vz-nqblq-zvzq Nzmncngr Kxtubq

¹³⁷ Vz-nqblq-zvzq nzmncngr kxtubq-esz'ngr, X drtwr kcng tqyrlqq rsakrlrngr.

¹³⁸ Natq kcng tqkapxq nzabrkitr drtwr, Murde nztubq-zvzng.

¹³⁹ Zngya ngr drtwrnge apule nyr kc tqngc, Murde enqmi rngeng mrbrtr mz drtwrdr Nzryrngrkxtr.

¹⁴⁰ Nzesalz-krm pq zlwz mz drtwrnge Murde angidati-zvzme bange.

¹⁴¹ Kxmule-esz' leplz nzobqszolr ninge, A' trmrbrtru mz drtwrnge nzalvztr-krmqng.

¹⁴² Yawe, nztubq-krm tqyc, tqyc, X Loukxtr scm ngi da angidr zvz.

¹⁴³ Delc kxmule-esz' nzkxpungr x nzvzkr drtwr nzprtzmqng bange, A' abrtz-ngrne nzo-zli-zvz-krnge nzti rm.

¹⁴⁴ Vz zvz nzokatr-krm ninge nzmc-krnge Nztubq-zvzkr natqm, murde ma tqbzx.

Wztx-ngrpwo Nzkrka'-krbo Bam

Wztx-ngrpwo Nzkrka'-krbo Bam

¹⁴⁵ Wztx-ngrpwo nzkrka'-krbo bam. X ayzlum natqnge, murde nao-zlix lrpzki rm.

¹⁴⁶ Yrnimi-zvzbo bam nzarlapx-krm ninge, Murde nayrlq-angidrx Loukxtr scm.

¹⁴⁷ Kqle-zvzx nim mz nourla kxtopwz mz nzokatr-krm ninge, Murde abrtrpo drtwrnge mz nzesalz-krm.

¹⁴⁸ Obqtx-zvzx mz nrlckxbq, Mz nzaotikr drtwrnge me pnz drtwrm.

¹⁴⁹ Mz nzaodu-zvz-krm ninge, xlrm natqnge, X mailz ninge mz nzalvztr-krmqng.

¹⁵⁰ Kxmule-esz' kxnzxpqbrlr-ngrdr nqmq krm Nzesolvztilr ninge, a' trmwxlrwxu.

¹⁵¹ Murde eso-aepztrpe' bange, X drtwr amrlx kcng tqyrlqq da angidr zvz.

¹⁵² Wz-ngrn natqm murde nayc-alo, Da kc tqwai nzkrlz-krngele, abzo mzli kc pnz.

Xlrm Natqnge Da Kc Tqwai Nzesalz-krmle

Xlrm Natqnge Da Kc Tqwai Nzesalz-krmle

¹⁵³ Xlrm natqnge x arlapx ninge mz nzkxpu-krnge, Murde dcpx zvz mz drtwrnge Loukxtr scm.

¹⁵⁴ X pipxbz mz leplz kx nqmq krnge tubq, Da kc tqwai nzesalz-krmle, murde ma tqbzx.

¹⁵⁵ Kxdrka'-ngrng trtxpnzngr nzrlapx-krdr, Murde trnzrtangrtilru nzti rm.

¹⁵⁶ Yawe, axplr mou ninge mz nzetukr nzaodu-krm, Murde vz-nqblqx me pnz drtwrm.

¹⁵⁷ Kxmule-esz' enqmi rngeng nzkqlu-zlwzng, A' trtxpnzngr nzesablqti-krnge Nzryrngrkxtr.

¹⁵⁸ Pxtxpx-ngrne kx drtwrdr litrpz bam, Murde trnzlxngitilru da kxtubq mz nzobq-krm.

¹⁵⁹ Yawe, arlapx ninge mz nivz lrm, Murde mrlzm bange nzalvztr-krmqng.

¹⁶⁰ X natqm mqngio mz da kxtubq. Delc drtwr amrlx kcng tqyrlqq nztubq-kzng.

Yrlq-angidrx Nzalvztr-krmqng

Yrlq-angidrx Nzalvztr-krmqng

¹⁶¹ Yawe, kxnzetung nzatrkati-krdr ninge trpnzngr noude, A' amatq-zlwzx natqm.

¹⁶² Apux bcnyr kc tqrmctile da kxpqtr mz nabzde, Murde abrtz-ngrne Nzryrngrkxtr

¹⁶³ Trkam bange natq ngr nzpokiangr, A' mrlzm bange natqm.

¹⁶⁴ Glqpx-zvzx nim mz zbq kang kqlu, Murde drtwr kcng tqyrlqq tubq-esz'ngr.

¹⁶⁵ Krkcng tzmrlz badr Loukxtr scm, nzmnc-zpwxng. X trpnzngr doa x da kx na-ataole nidr.

¹⁶⁶ Yawe, brti drtwrnge nzarlapx-krm ninge, Mz nzale-zvz-krnge da kx pitimeng.

¹⁶⁷ Lolvz-amqngix nqmq krm, Mz nzmrlz-zlwz-krmle bange.

¹⁶⁸ Yrlq-angidrx nzalvztr-krm, Da kc tqwai nzmc-krmle.

Zyzlr Ngrm Napnamilxtile Nabznge

Zyzlr Ngrm Napnamilxtile Nabznge

¹⁶⁹ Zyzlr ngrm napnamilxtile nabznge, Mz nzayzlu-krme natqnge mz nzvz-nqblq-krde nzesalz-krm.

¹⁷⁰ Lalztq-ngrm nzkrka'-krnge, X arlapx ninge mz nzvz-nqblq-krde natqm.

¹⁷¹ Naglqlz-zvz-ngrne nim Mz nzalvztr-krme bange nqmq krm.

¹⁷² Na-angrlvzx nzesalz-krm, Murde drtwr amrlx kcng tqyrlqq tubq-esz'ngr.

¹⁷³ Oliqm mz nzokatr-krm ninge, Murde lolvz-amqngi-zvzx me pnz drtwrm.

¹⁷⁴ Yawe, obqtipxx nzarlapx-krm ninge, Murde mrlzm bange Loukxtr scm.

¹⁷⁵ Okatrp ninge mz Nzryrngrkxtr Murde naglqpxx nim mzli ka tqlu-ngrne.

¹⁷⁶ Zmrlz ngrm nakqlelvzti-zvzle ninge. Murde kxmule-esz' vecpx-lzbqbo bam, A' trmrbrtitru mz drtwrnge lrpzki rm.