Sam 113 - Natqgu

Sam Kratrtqki-esz'-nzpnu-esz'-nrade-tq (113) Naglqlzku Yawe Mz Nzarmyalz-krgu Drtqde

¹ Naglqlzku Yawe! Nigu kxnzawz nedeng na-armyalzku drtqde.

² Nayzuo mzli ka nzrglqpxngr drtqde Tqvzpe, tqvzpe.

³ Mz zbq kang kqlu nigu leplz mz nrlc tulvzo Na-awi-ngrbzku bade nqmq krde.

⁴ Murde aclve-atwrnr-ngrde lr mrkzbleng amrlx. X nzetukr zmatq ngrde krlzlzbzle bongavz.

⁵ Trpnzngr kx apule Yawe kc tqngi Gct rgu, Mz nzwxbutxlz-krde mz tron nyzde Heven.

⁶ Sc tqobqlvztile bongavz x drtc', Mz nzaclve-angidr-krdeleng.

⁷ Murde naokatrle leplz kx trnzrngiscung, Mz nzkapx-krmle nidr mz nzkxpu-krdr.

⁸ X armyalzle nidr murde nanginidr nradrtq kxnzetung Kcng tzmailzlr leplz nedeng.

⁹ Ngi-batrpzle mz olvz kxvz-nrbalq nzrngine-krde doa kxnztopwzng, Murde na-abrtz-ngrde doa nede lcng. Naglqlzku Yawe!