Sam 112 - Natqgu

Sam Kratrtqki-esz'-nzpnu-esz'-nrade-li (112) Nqmq Kr Ncblo Ne Gct Kzdq Nabz Ngr A, B, C

¹ Awibzku mz Yawe! Murde amrlzle ncblo kx Bilvzle natqde x amrluele nide.

² Clvele mrnyzde kcng naxplrng mz nzaclve-krdr. Doa nedeng kxnztubqng, sa na-amrlz Gct.

³ Esalz-ngrbz Gct bade da kxmrlzting kxkqlu. Gct okatrle nide murde natubq.

⁴ Ipq ncblo lc kztedeng mz nzvz-nqblq-krde zmrlz ngrde, nzryckr drtwrde, x nztubq-krde. Jzsle da kx naokatrle leplz kc-kzng, mz nzngini-krbzle lrpzki badr.

⁵ Kabzle da kxkqlu mz krkcng trnzrngiscung. Lalztqbzle mz Gct x alele da kx rsakrlrngr mz nzwz-krde.

⁶ Murde ncblo kxtubq kxtr-rnrcti-lzbqu Nadcpx zvz mz drtwr leplz.

⁷ Obqtipx-zvzle Yawe x Prlxpxle kx nabzde trtaprlzpuu mz nrpa kxtrka.

⁸ ?Rnrcti-lzbq-ngrde? Trtingr, a' tu-amqngile. Sa namcle nzaovxiokr Yawe enqmi rdeng.

⁹ Tresakiu nzrka-krbzle da mz kxrsuti drtwr. Vz zvz nzayzlu-krbz Gct bade mz nqmq krde lc tqtubq. Wxbu me matq mz mzlir leplz.

¹⁰ X angya drtwr kxdrka'-ngrng mzli kc namc-ngrdr nide. Ycpwz pipz kxdrka'-ngrng lcng sa namrbr, x mane nzmadqti-krdr nqngidr mz zngya. Zbz da amrlx kcng tqmrlzbz badr sa nangitx brmrda x sa na-apulr zsikapu kx ngilia.