Sam 111 - Natqgu

Sam Kratrtqki-esz'-nzpnu-esz'-nrade-esz' (111) Nqmq Kr Gct Kzdq Nabz Ngr A, B, C

¹ Awi Yawe! Glqpxku Yawe! Bilvzx nide mz nabznge atwrnrngr, mz nzyrlwr-lxblr-krgr badr leplz nedeng.

² Clvele nrlc x da kcng tqwz-ngrde, tqaletileng nzmyalzng. Delc, leplz amrlx na-aotingr drtwrdr da lcng mz nzabrtzlvz-krdrleng.

³ Eu, da lcng amrlx nzaelwapx-ngrdr zmrlue x zmatq rde. Glqpxku nztubq-krde kc tqvzpe tqvzpe.

⁴ Ipqle nigu mz zmrlz ngrde kxmyalz x ycngr drtwrde nigu. Jzsle nigu x nayc zvz mz drtwrgu rkx ngrdeng.

⁵ Kabzle dakxnzng mz leplz kcng tzamrluelr nide. Lolvz-amqngile mz drtwrde da kx esalz-ngrbzle badr.

⁶ Mz nzaprc-krbzle drtc' ngr lr mrkzbleng mz doa nedeng, Nide kc tqaelwapx-ngrbzle zmatq rde badr.

⁷ Okatrle nidr mz nzaclve-krdeng kxtubq. Prlxpx-zvzle da angidr x nzrsakrlrngr.

⁸ Rkapx zvz natq kx rsakrlrngr. Sa na-atutrleng murde nqmq krde mrlz x tubq.

^9-10 Takitrde nzangio-krgu drtqde kxtr mz nzamrluengr murde Vz-nqblq-zvzle nzesalz-krde x Witi nelzde nzarlapx-krde leplz nedeng. X aelwapx-ngrgu nzyrplapx-krgu mz nzamrlue-krgu nide. Yawe kabzle nzrkrlz-angidrngr mz krkcng tzyrlq-angidrlr natqde. Zbq kalvz nzrglqpxngr nide navz zvz x tqvzpe, tqvzpe.