Sam 107 - Natqgu

Sam Kratrtqki-esz'-nrade-rlimz (107) Gct Ayzlu-zvz-ngrbzle Natq Leplz Nedeng Nzawingr

¹ Na-awi-ngrbzku mz Yawe nzmrlz-esz'ngr-krde. Murde aodu-zvzle nigu.

² Naglqlz-zvzku nide, Murde arlapxbzle nigu mz mq enqmi rgung,

³ Mz nzkapx-krmle nigu mrkzbleng mz nrlc tulvzo. Murde nayrlwr-lxblrku mz drtc' nyzde.

Kxnzayoneng Lzke

⁴ Kzdung nigu nzayoneng lzke, Me trpnzngr lrpzki kx narmcti-ngrdr mztea kx namnc-ngrdr.

⁵ Kztegu lcng nzbrtale-zlwzng, nzbrlxkz-zlwzng, X mztr tclvrting.

⁶ Zbz sc tzkqlepelr Yawe, Kc tqkatxpxpebzle nzkxpu-krdr.

⁷ Mailzle nidr mz lrpzki kxtubq, Vz, vz nzkrlzbzlr mztea kx namnc-zpwx-ngrdr.

^8-9 Rkabz lue mz kxnzbrlxkzng, X dakxnzng kxmrlzting mz kxnzbrtaleng. “Awi Yawe, mz nivz lrm kc tqyc tqyc, eu. Okatr-zvzq nigr. Awi Yawe, mz nivz lrm.”

Kxnzmncng Mz Presin

¹⁰ Kzdung nigu nzatolva-ngrng mz presin, Mz nzmncpx-krmlr me tungr nzlo.

¹¹ Murde nzrnzlvzolr lou sc Gct kc tqmyatxlz-esz'ngr, X drtqdr sa kz nzrlolvzngr nzalvztr-krdeng.

¹² Delc tqngi-batr-ngrbzle nzetqkr drtqdr mz nzwz-kato-krdr. X nzyangrngapeng, a' trpnzngr kx naokatrle nidr.

¹³ Zbz sc tzkqlepelr Yawe, Kc tqkatxpxpebzle nzkxpu-krdr.

¹⁴ Aopxbzle drtqdr mz da kc tzatolva-ngrdr, X vzmipxmleng mz nabz nzlo mz zyzlr.

^15-16 Zmatq ngrde myaszpxle naonrx ngr presin, Mz nzodati-atwrnr-krdele. “Awi Yawe, mz nivz lrm kc tqyc tqyc, eu. Okatr-zvzq nigr. Awi Yawe, mz nivz lrm.”

Kxnzyagoxng

¹⁷ Kzdung nigu nzpxtxpx-ngrdr Yawe mz nzngqngu-krdr, X ayrplapxle nidr mz alwx ngrdrng mz nzbatr-krbzle nzyagox-zlwz-krdr.

¹⁸ Mzli lc nzpxpe-ngrdr nzmungr, X nabzpeng.

¹⁹ Zbz sc tzkqlepelr Yawe, Kc tqkatxpxpebzle nzkxpu-krdr.

²⁰ Yawe amrlzle nrkrdrtqdr mz zyagox lcng mz nzycmnetx-krpwzle. Delc tzrlapx-ngrdr mz nzbzngr.

²¹ “Awi Yawe, mz nivz lrm kc tqyc tqyc, eu. Okatr-zvzq nigr. Awi Yawe, mz nivz lrm.

²² Abrtz-zlwz-ngrgr nim nzkatxpx-krbzme Nzkxpu-krgrngq. Abrtz-zlwz-ngrgr nim. Naglqpx-zvzkr nim mz nzngr-krgr nabz, X mz nzale-krgr blz. Naglqpx-zvzkr nim.”

Kxnzalilvcneng Mz Lcsu

²³ Kzdung nigu nzalilvcneng mz lcsu prla, Murde nzrtrngztibzlr nzmabz-krdr elr.

²⁴ Kztegu lcng nzmclr zmatq ngr Yawe, Mz da kx aleting dcpwe.

²⁵ Mzli kc tqycmneti-ngrdr nenq, x trlipu r nenq kc tqwqpe. X batrpzle nzvzdz-krm ebio wq.

²⁶ Ebio lc glqtxlzle lcsu scdr wq. X twzo-moule mrbrobz mz mzlirdr mz kztedeng. Trlipu lc avzdzmle nelzdr x alibzle drtwrdr.

²⁷ Dea-ngrdr tqvzne x nztaneng nzapulr ncblo kxnzrmnqng. X trpengr da kx nakrlzlr kx nartrngztibzlr.

²⁸ Zbz sc tzkqlepelr Yawe, Kc tqkatxpxpebzle nzkxpu-krdr.

²⁹ Ycmnebz mz nenq x sc tqamaope, Mz ebio x nrwx kc tqvope.

³⁰ Kztegu lcng nzabrtztx-zlwz-ngrdr nzvopekr nrwx, X sc tqmailztrpeng Gct mz nabzn kc naokitrlr.

³¹ “Awi Yawe, mz nivz lrm kc tqyc tqyc, eu. Okatr-zvzq nigr. Awi Yawe, mz nivz lrm.

³² Napipxbzkr nimq mz mz lrtzlvzng, X mz leplz amrlx. Napipxbzkr nimq.”

?Nzayrplapxngr O Nzamrlzngr?

³³ Yawe apztx-atwrnr-ngrde lue kxnzetuting, X aesakile nzyrlelz-krm aulzng,

³⁴ X apiz-kzle drtc' murde trpnzngr da kx nalvcpu mrlcde, Mz nzayrplapx-krde kxdrka'-ngrng kcng tzmncng elr.

³⁵ A' me ngi drta'ngr ngi nabzdeng kx lrngr lue, X drtc' kx mingrting yrlelz-ngrm aulzng.

³⁶ Murde navzmimle melrmqgung kxnzbrtaleng namncng mrlcde, Mz nzwz-krdr mztea nyzdr kx namnc-ngrdr.

³⁷ Nzrwz-ngrng nrlanc x nzpetilr nounc, X nzrnginanqng dakxnzng x nranc kxkqlu.

³⁸ Amrlz-zvzle nidr x ngi-batrpzle nzrmika-krdr doa kxkqlu, X nzkqlunepxkr animol nedrng.

?Kxnzyrplapxng O Kxdrka'-ngrng?

³⁹ Mzli kznike leplz nzobqszo-ngrdr nigu Mz nzatalvzo-krbzlr drtwrgu x nzaetq-zlwz-krbzlr drtqgu,

⁴⁰ Gct kc tqobqszo-ngrde kxnzetung kxnzglqpx-lzbqng, X batrpzle nzayone-krdr nzapulr kx trpnzngr me tutrngr nzvzne-krdr.

⁴¹ A' katxpxbzle nzkxpu-krgu, nigu leplz txneng, X aclvele nigu mz nzapu-krgu sip nedeng.

⁴² Kxnztubqng nzmclr nqmq krde x nzabrtz-zlwz-ngrdr. A' kxdrka'-ngrng nzwx-nabu-txpwzng.

⁴³ Krkcng tzyrplapxng nakrlzlr da lcng Mz nzaotikr drtwrdr nzetukr nzaodukr Yawe nigu.